स्काउटले सुरु गर्यो संक्रमितको शव व्यवस्थापन

विराटनगर । नेपाल स्काउट प्रदेश १ को आयोजनामा विराटनगरमा जारी शव व्यवस्थापन तालिम सम्पन्न भएको छ । तालिममा सहभागीहरुले समापन संगै शव व्यवस्थापन गर्ने जिम्मेवारी पाएका छन्  । आज नै कोरोना संक्रमणबाट बेलबारीमा मृत्यु भएका एक व्यक्तिको शव व्यवस्थापन गर्नुपर्ने भएको बेलबारी नगरका स्काउट संयोजक बादल देवानले बताउनुभयो । 

स्काउट प्रदेश १ का संयोजक रवि खनालले मोरंगमा नेपाली सेनाको सहयोगमा १५ जना स्काउटका सदस्यलाई तालिम दिएर समूह समूहमा शव व्यवस्थापनमा खटाइएको बताउनु भयो ।

शव व्यवस्थापनका लागि जनशक्ति अभाव हुने अवस्था नाओस, शव व्यवस्थापनमा ढिलाइ नहोस भन्ने उद्देश्यले तालिमको आयोजना गरिएको संयोजक खनालले बताउनुभयो  । उहाँका अनुशार तालिम लिएका मध्ये ११ जनालाई तीन समूहमा बाँडेर शव व्यवस्थापनमा  खटाइएको हो ।

तालिमको समापन कार्यक्रममा कार्यक्रम संयोजक खनालले संकटको समयमा गैर सरकारी संस्था फिल्डमा न आएका बेला  स्काउटले स्वयंसेवाका रूपमा कोरोनाको नियन्त्रण, रोकथाम र निदानमा काम गर्दै जनताको विश्वास जित्न सफल भएको बताउनुभयो ।

शव व्यवस्थापन तालिमलाई नेपाली सेनाको पूर्वी पृतना  हेडक्वाटर इटहरीको सहयोगमा भैरव गण थलाहाको सह सेनानीको  टोलीले सहजीकरण गरेको हो । तालिमपछी भैरव गणका सह सेनानी राजेन्द्रबहादुर खनालले तालिममा पाएको सीपलाई  शव व्यवस्थापनमा कुशलता पूर्वक निर्वाह गर्न आग्रह गर्नुभयो । 

स्काउट प्रदेश १ ले सुनसरी  र झापामा पनि  १५–१५ जनालाई शव व्यवस्थापन तालिम दिइरहेको संयोजक खनालले जानकारी दिनुभयो ।