इलाम । इलामको सूर्योदय नगरपालिकाको फिक्कलमा जारी कान्दुक भेट्रान फाइभ ए साइड फुटसल प्रतियोगिताको सेमीफाइनल समिकरण पुरा भएको छ ।
इन्डो–नेपाल फुटसल अन्तर्गतपहिलो दिनको खेलबाट सेमीफाइनलमा भिड्ने टोलीहरु पक्का भएका हुन् । प्रतियोगिताको पहिलो सेमीफाइनलमा इलाम भेट्रान्स र सूर्योदय भेट्रान्स बिच प्रतिस्पर्धा हुनेछ । त्यसैगरी दोश्रो सेमीफाइनलमा आहाले भेट्रान्स र पाहुना टोली दार्जिलिङ भेट्रान्स बिच प्रतिस्पर्धा हुनेछ । प्रतियोगिताको आजको पहिलो खेलमा इलाम भेट्रान्सले पाहुना टोली सुकिया भेट्रान्सलाई टाइव्रेकरमा ३–२ ले हराउँदै सेमीफाइनल प्रवेश गरेको छ । प्रतियोगिताको निर्धारित समयमा दुवै टोलीबाट ९–९ गोल भएपछि निर्णयको लागि टाइव्रेकर रोजिएको थियो ।
इलामका लागि दर्शन भक्तराजले ४ गोल गर्नुभयो । सुरेन राईले २ गोल, राजु थापा, प्रकाश थाम्सुहाङ र दिपक राईले १–१ गर्नुभयो । सुकियाको लागि डेचेन शेपाले ५ गोल गरे । नयन लेप्चाले २ गोल तथा सन्जय भुटिया र तेन्जिङ भुटियाले १–१ गोल गर्नुभयो ।
त्यसैगरी दोश्रो खेलमा आहाले भेट्रान्सले पेम्वा सेभेनलाई ३–२ गोल अन्तरले हरायो । आहालेको जीतमा खड्ग घलेले २ गोल र दिलकुमार कुलुङले १–१ गोल गर्नुभयो । पेम्वा सेभेनको लागि पुष्प याङ्मालीले २ गोल फर्काउनु भयो । तेश्रो खेलमा सूर्योदय भेट्रान्सले भेट्रान्स रोङ इलाभेनलाई १४–४ गोल अन्तरले हराउँदै सेमीफाइनल प्रवेश गर्न सफल रहयो । सूर्योदयको जीतमा नगर प्रमुख रणबहादुर राईले ६ गोल गर्नुभयो । सम्राट राईले ४ गोल, शरण राई २ गोल तथा किशोर राई र सन्जय गोलेले समान १–१ गोल गर्नुभयो । रोङका लागि योगराज राईले ३ र दौलत राईले १ गोल फर्काउनु भयो । अन्तिम खेलमा दार्जिलिङ भेट्रान्सले युनाइटेड भेट्रान्सलाई ३–२ गोल अन्तरले पराजित गर्यो । दार्जिलिङको जीतमा सुवास सुब्बा, राजु तामाङ र दावा तामाङले समान १–१ गोल गरे । युनाइटेडका लागि विके याङ्मालीले २ गोल फर्काउनु भयो।
कान्दुक रिक्रिएसन सेन्टरको आयोजना र सूर्योदय नगर खेलकुद विकास समितिको सहयोगमा आगामी २३ गतेसम्म संचालन हुने प्रतियोगितामा भारतका २ टिम सहित ८ टिमको सहभागिता रहेको थियो । कान्दुक रिक्रिएन सेन्टरको फूटसल मैदानमा हुने प्रतियोगिताको बिजेताले ३५ हजार ५ र उपबिजेताले १६ हजार ५ रुपैंयाँ सहित ट्रफि, मेडल र प्रमाणपत्र प्राप्त गर्नेछ । सेमीफाइनलका दुवै खेल शुक्रबार हुनेछ ।
