काठमाडौं ।बार्सिलोनाले तीन गोलको अग्रता गुमाउँदै सेल्टा भिगोसँग ३–३ को बराबरी खेलेको एक दिन पनि नबित्दै साबिक विजेता एथ्लेटिको म्याड्रिडले इन्जुरी समयमा ३–१ को अग्रता गुमाउँदै भ्यालेन्सियासँग ३–३ कै बराबरी खेल्न बाध्य बनेको छ ।
इन्जुरी समयको सुरुवातसम्म एथ्लेटिकोले ३–१ को अग्रता कायम राखेको थियो । तर, ह्युगो डुरोले खेलको ९२ र ९६ औँ मिनेटमा गोल गर्दै एथ्लेटिकोलाई अंक बाँड्न बाध्य बनायो । खेलमा अग्रता भने एथ्लेटिकोले लिएको हो । लुइस सुवारेजले ३५ औँ मिनेटमा गोल गर्दै टोलीलाई अग्रता दिलाउनु भयो ।
दोस्रो हाफमा स्टेफन साभिचले आत्मघाती गोल गरे पछि भ्यालेन्सियाले एक गोल फर्कायो तर लगत्तै एन्टोनी ग्रिजमान र सिमे भर्साल्कोले दुई मिनेटको अन्तरमा गोल गर्दै एथ्लेटिकोको अग्रता फराकिलो बनायो । जीततर्फ अघि बढिरहेको एथ्लेटिकोलाई डुरोले इन्जुरी समयमा स्तब्ध बनायो । बराबरीपछि एथ्लेटिको २३ अंकसहित लिगको चौथो स्थानमा सिमित बनेको छ । भ्यालेन्सिया १७ अंकसहित लिगको १० औँ स्थानमा रहेको छ ।
