काठमाडौं । प्रधानसेनापति राष्ट्रिय लन टेनिस प्रतियोगिता हुने भएको छ। आज नेपाली सेनाले पत्रकार सम्मेलन गरी प्रतियोगिता मंसिर २७ देखि पुस ५ गतेसम्म हुने जानकारी गराएको हो।
यस्तै प्रतियोगितामा खुलातर्फ महिला र पुरुष गरी चार प्रतिष्पर्धा हुनेछन् भने भेट्रानतर्फ विभिन्न उमेर समूहमा सातवटा र एक अन्तर सरकारी प्रतिष्पर्धा हुनेछ। प्रतियोगिता अन्तर्राष्ट्रिय टेनिस संघ र राष्ट्रिय टेनिस संघको नियमअनुसार खेलाइने आयोजकले जनाएको छ।
प्रतियोगिताका सबै खेल आर्मी अफिसर्स क्लबको दुईवटा कोर्ट र दशरथ रंगशालामा रहेका दुई कोर्टमा सञ्चालन हुनेछन्। यसैगरी प्रतियोगितामा सहभागि खेलाडीहरुले कोरोनाबिरुद्धको खोप लगाएको हुनुपर्नेछ।
खुलातर्फ विजयी एकल पुरुष र महिलाले समान ५०–५० हजार रुपैयाँ पुरस्कार पाउने छन् । डबल महिला र पुरुषतर्फ ४० हजार रुपैयाँ पुरस्कार रहेको सेनाले जनाएको छ।
त्यस्तै भेट्रानतर्फ एकलले ३० हजार रुपैयाँ, डबलले २५ हजार रुपैयाँ र अन्तर सरकारी तर्फको बिजेतालाई २५ हजार रुपैयाँ प्रदान गरिनेछ।
