विराटनगर । अध्यक्ष र पदाधिकारी कसलाई बनाउने भन्नेबारे सहमति जुट्न नसकेपछि नेकपा माओवादी केन्द्र प्रदेश १ को अधिवेशन लम्बिएको छ । नयाँ नेतृत्वमा पदाधिकारीका लागि आकांक्षी धेरै भएपछि अधिवेशन लम्बिएको हो ।
यद्यपि नयाँ नेतृत्वका लागि २६९ सदस्यीय कमिटी बनाउने सहमति जुटेको छ । यस्तै सदस्य पदमा सहमति भइसकेका सदस्यहरुको नाम आज सार्वजनिक गरिने भएको छ । शनिबार सुरु भएको प्रदेश सम्मेलनले हिजो नेतृत्व चयन गर्ने कार्यतालिका थियो । तर, नेतृत्वका आकांक्षी धेरै भएर सहमति हुन नसक्दा अधिवेशन लम्बिन पुगेको हो ।
हिजो रातिसम्म नेतृत्व छनोट गर्नेगरी निर्वाचनको कार्यसूची प्रकाशित भएको थियो । तर, सहमतिको प्रयास गर्ने भन्दै नेताहरू छलफलमा बसेपछि कार्यसूची प्रभावित भएको निर्वाचन समितिले जनाएको छ । प्रदेश अध्यक्षको दौडमा सुरेशकुमार राई (हिमाल), हेमराज भण्डारी, ईन्द्रबहादुर आङ्बो र सुदन किराती दौडमा हुनुहुन्छ ।
प्रदेशमा चुनिएका २६९ जना सदस्यले अध्यक्षसहित पदाधिकारी छान्ने नेताहरुले बताएका छन् । अधिवेशनमा प्रदेशभरिका प्रतिनिधि र पर्यवेक्षक गरी झण्डै १५ सय सहभागी छन् ।
यस्तै प्रदेश अधिवेशनले पार्टीको विधानअनुसार अध्यक्ष एक, उपाध्यक्ष महिलासहित तीन, सचिव एक, सहसचिव तीन र कोषाध्यक्षसहितको प्रदेश समिति निर्वाचित गर्नेछ । हिजो राति छानिएका सदस्यको नामलाई लिएर केही जिल्लामा भने असन्तुष्टि रहेको देखिन्छ । पदाधिकारी पनि सकेसम्म सहमतिबाटै तय गरिने छ ।
माओवादीका प्रदेश इन्चार्ज राम कार्कीले प्रदेशको सदस्यहरू सहमतिबाट टुंगिसकेकाले अब पदाधिकारीको चयनमात्र बाँकी रहेको बताउनुभयो ।
