मलेसियामा भारी मौसमी बाढीबाट मृत्यु हुनेको संख्या ४१ पुगेको छ । आठ जना बेपत्ता छन् । बाढीमा परी मृत्यु हुनेमा २६ पुरुष, १३ महिला र दुई बालबालिका रहेका छन् ।
‘४१ जनाको मृत्युमध्ये २५ जना सेलाङ्गोरमा, १५ जना पहाङमा र एक जना केलान्तानमा रहेका छन्’, प्रहरी महानिरीक्षक तान श्री एक्रिल सानी अब्दुल्लाह सानीलाई उदृत गर्दै विभिन्न सञ्चारमाध्यमले जनाएका छन् ।
मलेसियाको मौसम विभागले आज पहाङ, तेरेङ्गानु र केलान्तानका तटीय राज्यहरूमा भारी वर्षा र मेघगर्जनसहित वर्षाको सम्भावना रहेको जनाएको छ।
मलेसियामा वर्षायाममा बाढी आउनु सामान्य कुरा हो तर डिसेम्बर १७ मा देशको पूर्वी क्षेत्रमा परेको मुसलधारे पानी डिसेम्बर १९ सम्म जारी रहेपछि यसले विनाशकारी रूप लिएको छ।
