मरिससविरुद्धको दोस्रो मैत्रीपूर्ण खेलमा नेपाल विजयी

काठमाडौं । मरिससविरुद्धको दोस्रो मैत्रीपूर्ण खेलमा नेपाल १–० ले विजयी भएको छ ।

दशरथ रंगशालामा जारी खेलको ११औं खेलमा सुजल श्रेष्ठले गरेको गोल नै जितका लागि पर्याप्त बन्यो । यसै खेलबाट राष्ट्रिय टिममा डेब्यु गरेका नविन गुरुङको कर्नर प्रहार मरिससका खेलाडीले पन्च गरेर जोगाएका थिए । त्यसपछि नेपालका आशिष लामाले दिएको पास पुजन उपरकोटीले ब्याक फ्लिक गर्दै सुजललाई पास मिलाइदिनु भएको थियो ।

लगत्तै मरिससले बराबरी गर्ने अवसर पाए पनि चुक्दा नेपालले जितेको हो । नेपालका दिनेश राजवंशीले लिन्सले ब्रेसलाई फाउल गरेपछि मरिससले पेनाल्टी पाएको थियो । तर, १३औं मिनेटमा मरिससका कप्तान एन्डी सोफीको पेनाल्टी प्रहार नेपालका कप्तान किरण चेम्जोङले दायाँ डाइभ गर्दै बचाउनु भएको थियो ।

पहिलो हाफमा नेपालले एक गोलको अग्रता लिएको खेलको दोस्रो हाफ भने तनावपूर्ण रह्यो । दोस्रो हाफमा नेपालका एक र मरिससका दुई खेलाडीले रातो कार्ड पाए ।

खेलको ७१औं मिनेटमा नेपालका पुजन उपरकोटी र मरिससका एड्रिएन बोटलर तथा ८०औं मिनेटमा मरिससका एमानुएल फलचन्दले रातो कार्ड पाउनु भएको थियो । दोस्रो हाफमा दुवै टिमले गोल गर्न सकेन् ।

योसँगै नेपालले मरिससविरुद्धको दुबै मैत्रीपूर्ण खेल जितेको छ । शनिबार भएको पहिलो मैत्रीपूर्ण खेल पनि नेपालले १–० ले जितेको थियो । उक्त खेलमा विमल घर्ती मगरले गोल गर्नु भएको थियो ।

Back to top button