हलेसी मन्दिरमा ३ वर्षमा २ करोड भेटी संकलन

खोटाङ । प्रसिद्ध त्रिधार्मिकस्थल खोटाङको हलेसी महादेव मन्दिरबाट ३ वर्षमा रु १ करोड ९२ लाख ३७ हजार ४ सय ८८ आम्दानी भएको छ।

त्यस्तै रु १करोड १५ लाख ३१ हजार ५० व्यय भएको छ। हिन्दू, बौद्ध र किराँत धर्मावलम्बीको सङ्गमस्थल हलेसी आउने दर्शनार्थीबाट आर्थिक वर्ष २०७५–०७६ मा रु ८७ लाख १९ हजार २ सय १५ आय र रु ४२ लाख ४२ हजार ३ सय ५० व्यय, आव २०७६–०७८ मा रु ५३ लाख ८९ हजार ८ सय ६९ आय र रु ४० लाख ६२ हजार ५ सय २१ व्यय तथा आव २०७७–०७८ मा रु ५१ लाख २८ हजार ४ सय ४ आय र रु ४२ लाख २६ हजार १ सय ७९ व्यय भएको हलेसी सूचना केन्द्रका प्रमुख सयन्द्र राईले जानकारी दिनुभयो ।

भेटीबापत जम्मा भएको रकम खर्च कटाएर रु ७७ लाख ६ हजार ४ सय ३८ हलेसी मन्दिर व्यवस्थापन समितिको खातामा रहेको छ। हलेसी मन्दिरमा आउने विदेशी दर्शनार्थीले चढाएका विदेशी मुद्रा तथा स्वदेश र विदेशका दर्शनार्थीले चढाएका सुनचाँदीका गरगहनालगायतका सामग्री भने हालसम्म सुरक्षित राखिएको छ।

हलेसी मन्दिरको भेटीलाई पारदर्शी बनाउन हलेसी चुवाचुङ नगरपालिका, मन्दिर व्यवस्थापन समिति र इलाका प्रहरी कार्यालय हलेसीका प्रतिनिधिले दानपेटिकाको चाँबी राख्ने गरेका हुन्।

मन्दिरबाट सङ्कलन भएको भेटीबाट मन्दिर वरिपरि, दिव्यध्वनि, होम भवन, मन्दिर व्यवस्थापन समितिको भवन, मन्दिरभित्र रेलिङ रङ्गरोगन, बसाहा थान धाराको ढल निकास (जेसिभी प्रयोग), भेटी गणना, अतिथि खाजा, खानेपानीको लागि हिलटेक खरिद, सूचना प्रकाशन, विभिन्न आर्थिक सहयोगलगायतमा खर्च भएको सूचना केन्द्रका प्रमुख राईले जानकारी दिनुभयो ।

प्राकृतिक रुपमा समेत विश्व प्रसिद्ध त्रिधार्मिकधाम हलेसीमा भाकल तथा दर्शन गर्न आउनेले दान गर्दै आएका छन्। हलेसीमा नेपालसँगै भारत, चीन, भूटान, जापान, श्रीलङ्का, अमेरिका, दक्षिण कोरियालगायत विभिन्न मुलुकबाट दर्शनार्थी तथा अवलोकनकर्ता आउने गर्छन ।

मध्यपहाडी लोकमार्गमा पर्ने हलेसीमा रामनवमीमा १५ दिन, बाला चतुर्दशीमा १२ दिन, शिवरात्रिमा सात दिन र हरितालिका तीजमा ३ दिन मेला लाग्ने गरेको छ।

Back to top button