१४ सांसदलाई निष्कासन नगरेसम्म संसद चल्दैनः एमाले उपाध्यक्ष बादल

काठमाडौं । नेकपा एमालेका उपाध्यक्ष रामबहादुर थापा बादलले नेकपा एकीकृत समाजवादीमा लागेका १४ सांसदलाई निष्कासन नगरेसम्म संसद नचल्ने बताउनुभएको छ ।

आसन्न निर्वाचनलाई केन्द्रित गरी एमाले सुर्खेतले आयोजना गरेको कर्णाली प्रदेशस्तरीय प्रशिक्षण तथा अभिमुखिकरणलाई सम्बोधन गर्दै उपाध्यक्ष थापाले यस्तो बताउनुभएको हो ।

देश र जनताको लागि राम्रो काम गरेकै कारण एमाले एकातर्फ र अरु सबै दल अर्कोतर्फ ध्रुविकृत भएको थापाले दावी गर्नुभयो।

‘एमालेले हटाएका १४ सांसदको सूचना टाँस गरिए मात्र एमसिसीलगायतका विषयमा संसदीय प्रक्रियामा भाग लिन्छ,’ उहाँले भन्नुभयो, ‘जनादेशको सरकारलाई हटाएर परमादेशबाट बनेको सरकारले देशलाई आर्थिक रुपमा संकटतर्फ धकेलेको र न्यायापालिका, कार्यपालिका तथा व्यवस्थापिकामा अराजकता फैलाएको छ।’

एमाले विगतको एकीकृत पार्टी नेपाल कम्युनिष्ट पार्टी (नेकपा)कै निरन्तरताको पार्टीका बुझ्नु पर्ने उहाँको भनाइ छ। ‘जनताको अपार मायाको कारण एमाले मुलुकमा सबैभन्दा शक्तिशाली पार्टी बनेको हो,’ उहाँले भन्नुभयो, ‘एमालेले अघि सारेको विकास र समृद्धिको महान यात्रालाई कुनै पनि शक्तिले रोक्न सक्दैन।’

यस्तै केन्द्रीय स्कुल विभाग, निर्वाचन विभाग र स्थानीय तह विभागको आयोजना तथा कर्णाली प्रदेश कमिटीको व्यवस्थापनमा आउँदो निर्वाचनलाई लक्षित गरि आयोजित प्रशिक्षणमा २ सय १५ जनाभन्दा बढीको सहभागिता छ।

Back to top button