काठमाडौं । एकीकृत समाजवादीका अध्यक्ष माधवकुमार नेपालले वैशाख ३० गतेका लागि तय भएको स्थानीय तहको चुनाव सार्ने विषयमा छलफल भइरहेको बताउनुभएको छ ।
अध्यक्ष नेपालले एमालेले संसद चल्न नदिएकाले विघटन गरेर प्याकेजमा तीन तहको चुनावमा जानुपर्ने प्रस्ताव अघि सार्नुभएको हो ।
उहाँले एमाले अध्यक्ष केपी शर्मा ओलीको वितण्डा रोक्नका लागि संसदको अर्ली इलेक्सन आवश्यक भएको जिकिर गर्नुभयो ।
संसदबाट बाहिरिने क्रममा अध्यक्ष नेपालले भन्नुभयो, ‘हाउस चल्न पनि नदिने। केही गतिविधि गर्न पनि नदिने। हाउसलाई पङ्गु बनाउने, भत्तासत्ता खाने, हामीलाई पनि हैरान पार्ने। त्यस्तो हो भने अब भंग गरिदिने। न संसद रहन्छ। न हंगामा गर्ने ठाउँ नै रहन्छ, चुनावमा जाने।’
उहाँले सञ्चारकर्मीहरुको जिज्ञासामा वैशाखको चुनाव सार्ने कुरा भइरहेको बताउनुभएको हो । नेपालसहित १४ सांसदको कारबाहीलाई पूर्णता दिनुपर्ने वा सभामुखले राजीनामा दिनुपर्ने मागसहित एमालेले भदौ २३ गतेदेखि संसद अवरुद्ध गर्दै आएको छ। एमाले विभाजनमा सभामुख अग्नि सापकोटाले भूमिका खेलेको एमालेको आरोप छ।
