रुसले सर्वसाधारणलाई निशाना बनाएर हवाई, रेकटसहितका आक्रमण गरिरहेको युक्रेनले बताएको छ। युक्रेनकी उपप्रधानमन्त्री ओल्हा स्तेफानिशिनाका अनुसार रुसले अस्पताल, प्राथमिक शिक्षा केन्द्र तथा विद्यालयहरुसहितलाई निशाना बनाएको हो ।
एक अन्तर्वार्ताको क्रममा उहाँले रुसले लगातार सर्वसाधारण, आवासीय क्षेत्र र सार्वजनिक स्थानमा आक्रमण गरे पनि युक्रेनी आर्मीले कडा प्रतिवाद गरिरहेको बताउनुभएको छ । रुसले सर्वसाधारणलाई विभाजित गर्न गम्भीर निशाना बनाइरहेको उहाँको भनाई छ ।
रुसले गरेको गोलाबारीका कारण आइतबार एक परिवारका चारजनाको मृत्यु भयो । युद्ध जारीरहेको इर्पिनबाट सुरक्षित स्थानमा जाने क्रममा उनीहरुको मृत्यु भएको हो ।
रुसकै आक्रमणका कारण तटीय शहर मारिपोलमा उद्धारको काम रोकिएको छ । सो शहर विगत पाँच दिनदेखि पानी, बिजुली तथा सरसफाइ जस्ता सेवाबाट बञ्चित भएको छ । खानेकुरा र पिउने पानीको पनि अभाव रहेको छ ।
आइतबार संयुक्त राष्ट्रसंघीय शरणार्थी सम्बन्धी उच्चायोगले दिएको जानकारी अनुसार रुसको आक्रमणका कारण कम्तीमा २६४ सर्वसाधारणको मृत्यु भएको छ । यस्तै कम्तीमा १५ लाख युक्रेनीले देश छोडिसकेका छन् ।
लगातार सर्वसाधारण निशानामा आएर उनीहरु मारिँदा पनि रुसले आफूले सैनिकहरुलाई मात्र आक्रमण गरेको दाबी गर्दै आएको छ । रुसले स्थल तथा आकाशबाट आतंककारी आक्रमण गरिरहेको उपप्रधानमन्त्री स्तेफानिशिनाले बताउनुभएको छ ।
उहाँले प्रतिकार गर्ने क्रममा रुसले ठूलो मात्रामा सैन्य क्षति बेहोर्नु परेको दाबी गर्नुभएको छ ।यद्यपि रुसले आफ्नो तर्फ भएको सैन्य हताहतीको कुनै जानकारी दिएको छैन ।
राजधानी किएभ नजिकैको इर्पिन शहरबाट सुरक्षित स्थानमा जाने प्रयासमा रहेका सर्वसाधारण आइतबार रुसी मोटार आक्रमणको निशानामा परेका छन् । सो आक्रमणमा एकै परिवारका कम्तीमा चारजनाको मृत्यु भएको स्थानीय अधिकारीलाई उद्धृत गर्दै अन्तर्राष्ट्रिय सञ्चारमाध्यमले जनाएका छन् ।
मृत्यु हुनेमा आमाबुवा र उनका दुई सन्तान छन् । सुरक्षित स्थान तर्फ जान लागेकाहरुमाथि मोटार आक्रमण भएको हो । कम्तीमा चारजनाको फुटपाथमै मृत्यु भएको छ ।
गएको शनिबारदेखि भत्किएको इर्पिन नदीको पुल वरपर हजारौँ त्रस्त सर्वसाधारण जम्मा भएका छन् । राजधानी किएभ तर्फ आउँदै गरेका रुसी सैनिकलाई रोक्नका लागि युक्रेनी सैनिकले पुल भत्काएका थिए ।
सर्वसाधारणलाई सो पुल हुँदै सुरक्षित स्थानमा जान सहयोग गर्न त्यहाँ युक्रेनी सैनिक थिए । तर रुसले सर्वसाधारणको भीडलाई नै निशाना बनाएको हो । रुसले दुईवटा मोटार वा तोप प्रहार गरेको अन्तर्राष्ट्रिय सञ्चारमाध्यमहरुले जनाएका छन् ।