उडान धमाधम रद्द र ढिलो हुन थालेपछि वायुसेवा कम्पनीले भने: फोन गरेर आउनुहोस

काठमाडौं । त्रिभुवन विमानस्थलको सूचना प्रणाली तथा राडारमा आएको खराबीका कारण आज बिहानैबाट आन्तरिक तथा बाहृय दुवै तर्फका उडान प्रभावित बनेका छन् ।

जसले गर्दा बिहानका लागि निर्धारित विभिन्न सेक्टरका उडान रद्द भएका छन् । यति एयरलाइन्सका अनुसार पोखरा, भैरहवा र विराटनगरका लागि निर्धारित तीन उडान रद्द भइसकेको छ । अन्य उडानहरू डिले भएको छ ।

अहिले त्रिभुवन विमानस्थलले प्रत्येक १५ मिनेटमा एक उडान वा अवतरण गर्न सकिने गरी प्रणाली चलाइरहेको छ । सामान्य अवस्थामा २–३ मिनेटकै अन्तरमा उडान–अवतरण हुने गर्छ ।

संचार उपकरण भएको विल्डिङमा पानी लिकेज भएर प्रणालीहरुमा खराबी आएको बताइएको छ । विमानस्थलमा समस्या आएपछि आज बिहानै प्राधिकरणका महानिर्देशक प्रदीप अधिकारीसहितको टोलीले अनुगमनसमेत गरेको छ ।

उता वायुसेवा कम्पनीहरूले भने जहाज उडानमा ढिलाइले उडानहरू प्रभावित भएको भन्दै यात्रुलाई फोन गरेर निर्धारित समयमा मात्र विमानस्थलमा जान अनुरोध गरेको छ ।

यति एयरलाइन्सले ०१–५९७००७४ मा फोन गर्न भनेको छ । बुद्ध एयरले उडान सम्बन्धी सबै जानकारी एपमा रहेको भन्दै त्यसमा समय हेरेर मात्र विमानस्थल जान सूचित गरेको छ ।