सर्लाहीको फूलजोर खोलाको पुलबाट बस खस्दा ४ जनाको मृत्यु, ३० यात्रु घाइते

काठमाडौं । पूर्व–पश्चिम राजमार्गअन्तर्गत सर्लाहीको फूलजोर खोलाको पुलबाट बस खस्दा ४ जनाको मृत्यु भएको छ।

वीरगन्जबाट जनकपुरतर्फ जाँदै गरेको ना४ख ८५५५ नम्बरको यात्रुबाहक बस आज बिहान करिब ११ बजेतिर पुलबाट तल खसेको जिल्ला प्रहरी कार्यलय सर्लाहीले जानकारी दिएको छ।

दुर्घटनामा परी ३० जना घाइते भएको जिल्ला प्रहरी कार्यालय सर्लाहीका डिएसपी माधवप्रसाद बुढाथोकीले जानकारी दिनुभयो। उहाँका अनुसार घाइतेहरुको लालबन्दी र रानीगंजका स्थानीय अस्पतालहरुमा उपचार भइरहेको छ।

मृतकहरुको पहिचान खुलिनसकेको डिएसपी बुढाथोकीले बताउनुभयो। बसको अगाडिपट्टिको टायर पड्किएर अनियन्त्रित हुँदा पुलबाट खसेको प्रारम्भिक अनुसन्धानमा देखिएको प्रहरीले जनाएको छ।