एक वृद्धको हत्या गरेको आरोपमा युवक पक्राउ

विराटनगर । एक वृद्धमाथि कुटपिट गरी हत्या गरेको आरोपमा एक युवकलाई प्रहरीले पक्राउ गरेको छ । पक्राउ पर्नेमा जिल्लाको सुन्दरहरैंचा नगरपालिका–६ का ३५ वर्षीय मणिकुमार तामाङ रहेका छन ।

मणिकुमारले चैत ३० गते स्थानीय ६४ वर्षीय देवीबहादुर तामाङलाई दाउरा प्रहार गरी घाइते बनाएका थिए । देवीबहादुर र स्थानीय मानबहादुर तामाङबीच जग्गाका विषयमा झगडा भइरहेका बेला मणिकुमारले उनीमाथि दाउरा प्रहार गरेका थिए ।

मानबहादुर मणिकुमारका बाबु हुन् । देवीबहादुरको न्युरो अस्पताल विराटनगरमा उपचारका क्रममा हिजो मृत्यु भएको थियो । पक्राउ परेका मणिकुमारमाथि थप अनुसन्धान भैरहेको इलाका प्रहरी कार्यालय बेलबारीले जानकारी दिएको छ ।