निलम्बित गभर्नर अधिकारीको रिटमा आज सुनुवाई हुँदै

काठमाडौं । नेपाल राष्ट्र बैंकका निलम्बित गभर्नर महाप्रसाद अधिकारीले सर्वोच्च अदालतमा दायर गरेको रिटमा आज सुनुवाइ हुँदैछ ।

निलम्बनमा पर्नुभएका गभर्नर अधिकारीले सरकारविरुद्ध दायर गरेको रिट सर्वोच्च अदालतमा हिजो दर्ता भएको थियो । अधिकारीको रिट निवेदनको पेशी आजका लागि तोकिएको छ ।

आफूमाथि अवैध रुपमा सरकारले कारवाही प्रक्रिया सुरू गरेको भन्दै निलम्बित गभर्नर अधिकारी सर्वोच्च पुग्नुभएको हो । सरकारले अधिकारीमाथि अनुशासन उल्लंघन गरेको आरोप लगाउँदै पूर्वन्यायाधीश पुरुषोत्तम भण्डारीको नेतृत्वमा अध्ययन समिति बनाएको छ । त्यससँगै उहाँ निलम्बनमा पर्नुभएको हो ।

सर्वोच्चमा दायर गरेको रिटमा अधिकारीले सरकारको निर्णय खारेज गरी आफूलाई काम गर्ने वातावरण मिलाउन अन्तरिम आदेशको माग गर्नुभएको छ ।  राष्ट्र बैंक ऐनमा गभर्नरलाई बर्खास्त गर्नुअघि अध्ययन समिति गठन गर्नु पर्ने व्यवस्था रहेको छ । हाल गठन गरिएको समितिलाई एक महिना भित्र प्रतिवेदन बुझाउन भनिएको छ ।