![](https://koshisandesh.com/wp-content/uploads/2022/05/Untitled.jpg)
![](https://koshisandesh.com/wp-content/uploads/2022/05/Untitled.jpg)
काठमाडौं । पेट्रोलियम पदार्थमा गरिएको मूल्यवृद्धि तत्काल खारेज गर्न सरकारसँग माग गर्दै संयुक्त विद्यार्थी संगठनले आज काठमाडौंमा विरोध प्रदर्शन गरेको छ।
पेट्रोल, डिजेल र मट्टितेलमा प्रतिलिटर १० रुपैयाँका दरले मूल्यवृद्धि गरेलगत्तै सो संगठनले नेपाल आयल निगमको केन्द्रिय कार्यालय टेकुमा पुगेर अविलम्ब निर्णय खारेज गर्न सरकारसँग माग गरेको हो।
जनताको जीवननै धान्न नसक्ने गरी सरकारले मूल्यवृद्धि गरेकाले तत्काल खारेज गर्न माग गर्दै विरोध प्रदर्शन गर्नु परेको मोहन वैद्य नेतृत्वको नेकपा (क्रान्तिकारी माओवादी) निकट विद्यार्थी संगठन अखिल (क्रान्तिकारी)का अध्यक्ष हरिकृष्ण गजुरेलले बताउनुभयो।
उहाँले सो मूल्यवृद्धि तत्काल खारेज नभए जन आन्दोलनको आँधीबेहरी सृजना गरी वर्तमान सरकार नै ध्वस्त पारिदिने चेतावनी समेत दिनुभयो।
विरोध प्रदर्शनमा उत्रिएकाहरुले ‘जनता मार्न पाइदैन, मूल्यवृद्धि चाहिँदैन,’ ‘मूल्यवृद्धि तत्काल खारेज गर’ भन्दै सरकारविरुद्ध चर्का नाराबाजी लगाएका थिए।
यस्तै,नेपाल आयल निगमले गएराति देखि लागू हुने गरी पेट्रोल, डिजेल र मट्टितेलमा प्रतिलिटर १० रुपैयाँ मूल्य बढाएपछि त्यसको चौतर्फी विरोध भईरहेको छ।