नवनिर्वाचित जनप्रतिनिधिलाई स्थानीय सरकार सञ्चालनसम्बन्धि अभिमुखिकरण तालिम दिइने

काठमाडौं । स्थानीय तहको निर्वाचनबाट नवनिर्वाचित पालिकाका जनप्रतिनिधिहरुलाई सरकारले दुई दिने अभिमुखीकरण तालिम दिने भएको छ ।

महानगर, उपमहानगर र नगरपालिका प्रमुख–उपप्रमुख तथा गाउँपालिकाका अध्यक्ष–उपाध्यक्षलाई स्थानीय सरकार सञ्चालन तथा स्थानीय विकाससम्बन्धी दुई दिने तालिम दिइने सङ्घीय मामिला तथा सामान्य प्रशासन मन्त्रालयले जनाएको छ ।

तालिममा पालिकाका काम, कर्तव्य र अधिकार तथा व्यवहारिक समस्या र समाधानका विषयमा जनप्रतिनिधिलाई प्रष्ट पारिने मन्त्रालयको भनाइ छ । सङ्घीय मामिला मन्त्रालय र प्रदेश सरकारसँगको सहकार्यमा तालिम हुन लागेको सूचनामा उल्लेख छ ।

प्रदेश १ र सुदूरपश्चिमका जनप्रतिनिधिलाई जेठको २५ र २६ गते, मधेस, गण्डकी र कर्णाली प्रदेशका जनप्रतिनिधिलाई जेठको २७ र २८ गते तथा बाग्मती र लुम्बिनी प्रदेशका जनप्रतिनिधिलाई जेठको ३० र ३१ गते तालिम दिइने मन्त्रालयले जनाएको छ ।

Back to top button