जुम्लामा ट्रक दुर्घटना, चालकको मृत्यु

जुम्ला । जुम्लामा स्याउ बोकेको ट्रक दुर्घटना हुँदा चालकको मृत्यु भएको छ । हिमा गाउँपालिका–१ आचार्य लिहीमा स्याउ बागमती प्रदेश, ०३००१ ख २१६४ नम्बरको ट्रक गएराति दुर्घटना भएको हो ।

जिल्ला प्रहरी कार्यालय जुम्लाका प्रहरी नायव उपरीक्षक नरेन्द्र चन्दका अनुसार दुर्घटनामा मकवानपुर घर हुने चालक अविनाश लामाको मृत्यु भएको छ ।

यस्तै मकवानपुर नै घर भएका गाडीका सहचालक हरि न्यौपाने घाइते हुनुभएको छ । घाइते न्यौपानेको कर्णाली स्वास्थ्य विज्ञान प्रतिष्ठानमा उपचार गरिएको छ । न्यौपानेको टाउकोमा चोट लागेको छ ।

हिमा गाउँपालिका १ का वडाध्यक्ष रतनबहादुर शाहीका अनुसार जुम्लाको कनकासुन्दरी गाउँपालिका गुठीज्यूलाबाट स्याउ लिएर सुर्खेत जादै गरेको ट्रक बझाङेखोलामा दुर्घटना भएको हो ।

नाग्म गमगढी सडक खण्ड अन्तर्गत हिमा गाउँपालिकाको सो क्षेत्र दुर्घटनाको जोखिम क्षेत्र हो । दुर्घटना भएको ट्रकमा ७ सय कार्टुन स्याउ रहेको व्यापारीहरुले बताएका छन् ।