विराटनगर । विराटनगरमा अपाङ्गता भएका व्यक्तिलाई लक्षित गर्दै रोजगार मेला आयोजना गरिने भएको छ ।
प्रदेशका विभिन्न जिल्लाका अपाङ्गता भएका व्यक्तिहरुलाई लक्षित गर्दै रोजगारीको सुनिश्चितताका लागि मेला आयोजना गर्न लागिएको हो ।
नेपाल उद्योग वाणिज्य महासंघ प्रदेश १. द लेप्रोसी मिसन नेपाल, राष्ट्रिय अपांग महासंघ नेपाल र करुणा फाउण्डेसनको संयुक्त आयोजनामा कार्तिक १८ र १९ गते मेला हुने भएको हो ।
सामाजिक विकास मन्त्रालय प्रदेश १ को समन्वय र उद्योग संगठन मोरङ, मोरङ व्यापार संघ, विराट व्यापार संघ, नेपाल घरेलु तथा साना उद्योग महासंघ मोरङको सहयोगमा मेला आयोजना हुने बताइएको छ ।
आज विराटनगरमा संयुक्त पत्रकार सम्मेलन गर्दै नेपाल उद्योग वाणिज्य महासंघ प्रदेश १ का उपाध्यक्ष राजेन्द्र राउतले अपाङ्गता भएका व्यक्तिहरुलाई रोजगारी प्रदान गर्नु नै मेलाको मुख्य उद्धेश्य रहेको बताउनुभयो ।
दुई दिनसम्म चल्ने मेलामा गार्मेन्ट, वित्तीय, शैक्षिक, साना उद्योग, स्वास्थ्य, उत्पादनलगायत ९ वटा क्षेत्रलाई प्राथमिकतामा राखिएको छ ।
