थारु भाषामा बोल्दै रिताले भनिन्,‘एमालेको उम्मेदवार भएपनि म तपाईहरुकै छोरी र बहिनी हुँ’

विराटनगर । चुनावी अभियानमा सक्रिय मोरङ क्षेत्र नम्बर ६ (१) की प्रदेशसभा सदस्यकी उम्मेदवार रिता न्यौपानेले जब थारु भाषाबाट सम्बोधन गर्दै आफु एमालेबाट उम्मेदवार बनेपनि तपाईहरु सबैको छोरी, बहिनी हुँ भन्दा उपस्थित सबैको ध्यान आकृष्ट भयो ।

उज्यालो नेपाल नामक संस्थाले आयोजना गरेको दिवा सांस्कृतिक तथा सम्मान कार्यक्रमलाई सम्बोधन गर्दै उहाँले यहि क्षेत्रमा रहेर शिक्षण, सामाजिक तथा खेलकुदलगायतका विभिन्न क्षेत्रमा काम गरेको सबैलाई थाहा रहेको बताउनुभयो ।

उहाँले भन्नुभयो,‘इटा गाममे कुछु कर्वे इटा दिमागमे ल्याके बिस बरससे शिक्षा क्षेत्रमे काम कर्दे एछोन, तोहर सबके बेटी तोहर सबके दिदिबहेन हमे सबैके सकेले गोड लाग्छुन, सकेले नमस्कार कर्छुन ।’

आफु कुनै नेताको नातेदार भएर उम्मेदवार नबनेको भन्दै उहाँले भन्नुभयो,‘ म त यस क्षेत्रका तमाम आमा बुवाकी छोरी हुँ, चुनाव जित्छु भनेर उम्मेदवार भएकी हुँ ।’

बुढीगंगामा विद्यालय सञ्चालन गर्दै हजारौं बालबालिकाको अभिभावक, तमाम अभिभावककी छोरी, युवाहरुको साथी बनेर सधैं सँगै रहेको बताउँदै न्यौपानेले भन्नुभयो,‘आफ्नी छोरीलाई जिताउने की अरुलाई त्यो तपाईहरुको जिम्मा हो ।’

उहाँले मोरङ क्षेत्र नम्बर ६ (१) को अवस्था, यहाँका जनताको समस्या, यहाँका युवाहरुको अवस्था, महिलाहरुको अवस्था सबैमा आफू जानकार रहेको भन्दै अहिले चुनावी अभियानका क्रममा पनि प्रसस्त सुझावहरु संकलन गरिरहेको बताउनुभयो ।

उहाँले भन्नुभयो,‘हामीले प्राथमकिताको आधारमा काम गर्नुछ, सबै भन्दा ठूलो कुरा यहाँको जीवनस्तर उकास्न युवा तथा महिलालाई आयआर्जनसँग जोड्नु छ ।’

कसरी यहाँको जीवनस्तर उकास्न सकिन्छ भन्नेमा नै आफ्नो ध्यान जाने भन्दै उहाँले शिक्षा र रोजगारीलाई प्राथमिकता दिने आफ्नो योजना समेत सुनाउनुभयो ।

‘कला सस्कृतिको सम्मान आर माया करम’ भन्ने नाराका साथ आयोजीत उक्त कार्यक्रममा बोल्दै उहाँले नारामा भनेजस्तै कला र सस्कृतीलाई सबैले माया गर्नुपर्ने जगेर्नाका लागि सबैले भूमिका खेल्नुपर्ने बताउनुभयो । उहाँले भन्नुभयो, ‘कला र संस्कृती हाम्रा सम्पति हुन्, यसलाई बचाई राख्न सबैले भूमिका खेल्नुपर्छ ।’