सत्ता गठबन्धन दलका घोषणापत्र शब्दहरुको थुप्रोमात्र : ओली

काठमाडौं । नेकपा एमालेका अध्यक्ष केपी शर्मा ओलीले सत्ता गठबन्धनमा रहेका दलहरुको घोषणापत्र शब्दहरुको थुप्रो मात्र भएको टिप्पणी गर्नुभएको छ ।

प्रवासी नेपाली मञ्चको प्रथम अन्तर्राष्ट्रिय अधिवेशनलाई आज काठमाडौंमा सम्बोधन गर्दै उहाँले जनता अलमल्याउने गरी जादुगरी कुराहरु राखेर घोषणापत्र बनाएको भन्दै आलोचना गर्नुभएको छ ।

चुनावका बेलामा ल्याउनैपर्ने भएकाले मात्र सत्तारुढ दलहरुले घोषणापत्र ल्याएको भन्दै ओलीले उनीहरुसँग कुनै योजना र कार्यक्रम नभएको आरोप लगाउनुभयो ।

‘यो गठबन्धनजस्तो बन्ने हो भने कसको नीति कार्यान्वयन गर्ने? सबैको खल्ती हेर्नुभयो भने रित्तै छ’ ओलीले भन्नुभयो, ‘घोषणापत्र नामका चिज निकाल्दैछन्, निकाल्नैपर्ने हुनाले निकालेका हुन्, यिनीहरुको घोषणापत्रमा केही छैन, पोलिटिकल पार्टीले प्रोग्राम दिनुपर्‍यो, सोच हुनुपर्‍यो, यिनका घोषणापत्र शब्दहरुको थुप्रो हो ।’