
पोखरा । गण्डकी प्रदेशका मुख्यमन्त्री कृष्णचन्द्र नेपाली पोखरेलले ऊर्जा स्रोत मन्त्री हरिशरण आचार्यलाई बर्खास्त गर्ने हुनुभएको छ । सत्ता गठबन्धनको साटो विपक्षीलाई सहयोग गरेको आरोपमा आचार्यलाई मुख्यमन्त्रीले आजै हटाउने हुनुभएको हो ।
आचार्यले गोरखा २ (१) बाट प्रदेशसभा सदस्यका लागि स्वतन्त्र उम्मेदवारी दिनुभएको थियो । बाबुराम भट्टराईको पार्टीबाट मन्त्री बन्नुभएका आचार्यले पछि उम्मेदवारी फिर्ता भने लिनुभएको थियो । नेपाल समाजवादी पार्टी भने सत्ता गठबन्धनमा सामेल छ । तर ,आचार्यले गोरखामा एमालेलाई सहयोग गरेको आरोप छ ।
मुख्यमन्त्री पोखरेल नवलपुरबाट पोखरा आउँदै गरेको उहाँनिकट स्रोतले जनायो । ‘पोखरा पुग्ने वित्तिकै प्रदेश प्रमुखलाई भेटेर पत्र दिनुहुनेछ,’ स्रोतले भन्यो ।
मन्त्री आचार्यले भने आज पनि कार्यकक्षमै हुनुहुन्छ । उहाँले आफू मन्त्रीबाट हटाइन लागेको थाहा नभएको बताउनुभयो। तर हटाइए पनि आफूलाई पश्चाताप नहुने उहाँको भनाइ छ । उम्मेदवारी दर्ता गर्दाको समयदेखि नै आफू कुनै पार्टी नरहेको र स्वतन्त्र भएको प्रतिक्रिया उहाँले दिनुभएको छ । ‘मैले कसैलाई भोट मागेको छैन, कसैको चाकडी गरेर पदमा बस्नु पनि छैन,’उहाँले भन्नुभयो ।
गोरखा २ (ख) बाट प्रदेश सभामा बाबुराम भट्टराईनिकट फणीन्द्र देवकोटा सत्ता गठबन्धनबाट उम्मेदवार हुनुहुन्छ ।