अस्ट्रेलियाले इङ्ल्यान्डलाई दियो २८१ रनको लक्ष्य

स्टिभ स्मिथको ९४ रनप्रेरित अस्ट्रेलियाले एकदिवसीय अन्तर्राष्ट्रिय शृंखलाको दोस्रो खेलमा इङ्ल्यान्डलाई २ सय ८१ रनको लक्ष्य दिएको छ। सिड्नी क्रिकेट मैदानमा टस जितेर ब्याटिङ रोजेको अस्ट्रेलियाका लागि १ सय १४ बलको सामना गरेका स्मिथले ५ चौका र १ छक्कासहित ९४ रनको शानदार इनिङ खेल्नुभयो।

आदिल राशिदले फालेको ४४औं ओभरको चौथो बलमा फिल साल्टको हातबाट क्याच हुँदा स्मिथ ६ रनले शतक बनाउनबाट चुक्नुभयो। यस्तै, मर्नुस लाबुस्चेनले ५५ बलमा ४ चौका र १ छक्कासहित ५८ रनको अर्धशतकीय इनिङ खेल्नुभएको थियो।

यस्तै, अस्ट्रेलियाका लागि ५९ बलको सामना गर्नुभएका मिचेल मार्सले २ चौका र २ छक्कासहित अर्धशतक बनाएर पेभेलियन फर्कीनुभएको थियो। त्यसबाहेक अन्य ब्याटरको प्रदर्शन उल्लेख्य रहेन।

इङ्ल्यान्डका लागि राशिदले सर्वाधिक तीन तथा क्रिस वोक्स र डेविड विलीले २–२ विकेट लिनुभयो। मोइन अलीले पनि एक विकेट हात पार्नुभयो।

बिहीबार भएको पहिलो एकदिवसीयमा अस्ट्रेलिया ६ विकेटले विजयी भएको थियो। अस्ट्रेलिया भ्रमणमा रहेको इङ्ल्यान्डलाई शृंखला जोगाउन आजको खेल जित्नै पर्ने दबाब छ।

आजको खेलमा पनि जित निकाल्न सके घरेलु टिमले एक खेल अगावै शृंखला हात पार्नेछ।

Back to top button