काठमाडौं । समानुपातिकतर्फ अहिलेसम्मको मतपरिणाम अनुसार, नेकपा एमाले सबैभन्दा बढी सिट पाउने दल बन्ने देखिएको छ ।
आज बिहान १० बजेसम्म ९२ लाख ८९ हजार मत गन्दा एमालेले सबैभन्दा धेरै २५ लाख ३० हजार २ सय १४ मत पाएको छ । यो मत अनुसार एमालेले ३५ सिट पाउने देखिएको छ ।
नेपाली कांग्रेसले समानुपातिकततर्फ २३ लाख ९६ हजार ९३ मत पाएको छ । यस आधारमा कांग्रेसले ३३ सिट पाउने छ ।
यस्तै, राष्ट्रिय स्वतन्त्र पार्टी (रास्वपा) माओवादी केन्द्रभन्दा अगाडि छ । रास्वपाले १० लाख ६२ हजार ९ सय ८० र माओवादी केन्द्र १० लाख ६१ हजार २०० मत पाएको छ । यस आधारमा दुवै दलले समान १५–१५ सिट पाउने देखिन्छ ।
राष्ट्रिय प्रजातन्त्र पार्टी (राप्रपा)ले ८ र जनता समाजवादी पार्टी (जसपा) नेपालले ४ सिट पाउने सम्भावना छ । राप्रपाले ५ लाख ४५ हजार १ सय ८८ र जसपाले ३ लाख २४ हजार ३ सय १० मत पाएको छ ।
हेर्नुहोस् समानुपातिक मतको विवरण:
दलको नाम | कुल मत | पाउने सिट |
नेकपा एमाले | २५३०२१४ | ३५ |
नेपाली कांग्रेस | २३९६०९३ | ३३ |
रास्वपा | १०६२९८० | १५ |
माओवादी केन्द्र | १०६१२०० | १५ |
राप्रपा | ५४५१८८ | ८ |
जसपा | ३२४३१० | ४ |
जनमत | २६१२१५ | ० |
एकीकृत समाजवादी | २५१४७६ | ० |
कुल सदर मत | ९८८९७१६ | ११० |
यस्तै, जनमत पार्टी र एकीकृत समाजवादी थ्रेसहोल्डको सीमा कटाउन प्रयासरत छन् । कूल सदर मतको ३ प्रतिशत मत नपाउने दलले थ्रेसहोल्ड कटाउँदैनन् र थ्रेसहोल्ड नकटाउने दलले समानुपातिकमा कुनै हिस्सा पाउँदैनन् ।
आज बिहान १० बजेसम्मको मतगणना अनुसार जनमत पार्टीले २ लाख ६१ हजार २ सय १५ र एकीकृत समाजवादी पार्टीले २ लाख ५१ हजार ४ सय ७६ मत पाएको छ । ३ प्रतिशतको थ्रेसहोल्ड कटाउनासाथ भने ३ देखि ४ सिट पाउने देखिन्छ ।
निर्वाचन आयोगका सहायक प्रवक्ता गुरुप्रसाद वाग्लेका अनुसार समानुपातिकमा ३ प्रतिशत कटाएका दलहरुको मतलाई सेन्ट लग विधिबाट हिसाब गरेर सिट निकालिन्छ । यो विधिमा हिसाब गर्दा १, ३, ५, ७, ९ अंकले भाग गरेर विभाजन गरी भागफल (क्यास्केट) निकाली सिटको बाँडफाँट गरिन्छ ।