विराटनगर । प्रदेश १ को प्रदेशसभामा नेकपा एमाले पहिलो पार्टी बनेको छ। प्रत्यक्षमा २५ र समानुपातिकमा १५ सिट गरी ४० सिट जित्दै एमाले पहिलो पार्टी बनेको हो । समानुपातिकतर्फको मतगणना सकिँदा एमालेले १५ सिट पाएको छ।
प्रदेशमा समानुपातिकमा १८ लाख ९९ हजार १ सय ४४ मत पाएको थियो । एमाले एक्लैले ६ लाख ६५ हजार ४ सय ६० मत पाएको छ । यस्तै, नेपाली काँग्रेसले ५ लाख ६२ हजार ९ सय ५६, राप्रपाले १ लाख ९८ हजार ५ सय ११, नेकपा माओवादी केन्द्रले १ लाख ८१ हजार २ सय ४५, जनता समाजवादी पार्टीले ६१ हजार ७ सय २३ र नेकपा एकीकृत समाजवादीले ५५ हजार ९ सय ५७ मत पाएका छन् ।
समानुपातिबाट एमालेले १५ पाउँदा नेपाली काँग्रेसले १२, नेकपा माओवादी केन्द्रले ४, राप्रपाले ४, जनता समाजवादी पार्टी र नेकपा एसले १–१ सिट पाउने भएका छन् । एमालेले प्रत्यक्षमा २५, कांग्रेसले १७, माओवादीले ९, नेकपा एसले ३ र राप्रपाले २ सिट पाएका छन् ।
५६ प्रत्यक्ष निर्वाचन क्षेत्र र ३७ समानुपातिक गरी प्रदेशमा ९३ सदस्यीय प्रदेशसभा छ । प्रत्यक्ष र समानुपातिक गरी एमालेको ४०, काँग्रेसको २९, माओवादीको १३, राप्रपाको ६, नेकपा एसको ४ र जसपाको १ सिट हुने भएको छ ।
प्रदेशमा सरकार बनाउन ९३ जनामध्ये ४७ जनाको आवश्यकता पर्छ । तर, प्रदेशमा कुनै दलले यो सिट संख्या प्राप्त गर्न सकेन । सरकार बनाउन अब दुई वा दुईभन्दा बढी दल मिलेर जानुपर्ने अवस्था देखिन्छ। गठबन्धन गरेर निर्वाचनमा होमिएका कांग्रेस, माओवादी र नेकपा एस मिल्दा पनि बहुमत नपुग्ने अवस्था छ ।
यो गठबन्धनले ४६ संसद प्राप्त गरेको छ । यता, एमालेलाई सरकार बनाउन राप्रपा र जसपाको समर्थन आवश्यक छ । एमालेलाई जसपा र राप्रपाले समर्थन गर्दा बहुमत पुग्छ ।
