काठमाडौं । रामेछापको खाँडादेवी गाउँपालिकामा अटो दुर्घटना हुँदा ५ जना घाइते भएका छन्।
आज बिहान खाडाँदेवी गाउँपालिका–३, भिरपानी हुन्दुरखोलामा पकरवासबाट सिन्धुली तर्फ जाँदै गरेको ज–१ ह ५०६९ नम्बरको अटो आँफै अनियन्त्रित भइ दुर्घटना भएको जिल्ला प्रहरी कार्यालय रामेछापले जनाएको छ।
प्रहरीका अनुसार दुर्घटनामा परी सिन्धुली कमलामाई नगरपालिका–६ भोटेपानीका ४३ वर्षीय चालक कुमार तामाङ टाउको र कम्मरमा गम्भीर चोट, सोही स्थानका ७० वर्षीय पदमबहादुर तामाङको पनि अवस्था गम्भीर रहेको छ।
यस्तै सिन्धुली कमलामाई नगरपालिका–६ कै ६५ वर्षीय रामबहादुर तामाङ, ३२ वर्षीया सम्झना तामाङ र १२ वर्षीया सुस्मा तामाङलाई पनि घाइते भएको प्रहरीले जनाएको छ ।
दुर्घटनामा घाइते भएका ५ जनालाई प्रहरीले उद्दार गरी उपचारको लागी घुलिखेल अस्पताल पठाएको जिल्ला प्रहरी कार्यालय रामेछापले जनाएको छ।