भारतमा एक विवाह समारोहमा आगलागी हुँदा ५ जनाको मृत्यु, ५५ घाइते

काठमाडौं । राजस्थानको जोधपुरमा बिहीबार एक घरमा बिहेको क्रममा आगलागी हुँदा ५ जनाको मृत्यु भएको छ । यस आगलागीमा हालसम्म प्राप्त जानकारी अनुसार ५५ जना घाइते भएको बीबीसी समाचारमा उल्लेख छ।

जोधपुरको शेरगढ थाना क्षेत्रमा बिहीबार साँझ चारवटा सिलिन्डर विस्फोट हुँदा ठूलो दुर्घटना भएको हो। जलेर हालसम्म ५ जनाको मृत्यु भइसकेको छ । घाइते ५५ जनाको जोधपुर जिल्ला अस्पतालमा उपचार भइरहेको छ ।

शेरगढ प्रहरी चौकीका इन्चार्ज देवेन्द्र सिंहले भन्नुभयो, ‘शेरगढ थाना क्षेत्रको भुंगरा बस्तीमा विवाह समारोह चलिरहेको थियो, त्यही क्रममा चारवटा सिलिण्डर विष्फोट भएको थियो ।‘

यस्तै, जोधपुर ग्रामीण एसपी अनिल कुमारका अनुसार ग्यास चुहावटका कारण सिलिन्डर विष्फोट भएको हो। उहाँले अस्पतालमा भर्ना भएका २५ जनाको अवस्था गम्भीर रहेको र उनीहरु ६० प्रतिशतभन्दा बढी जलेको बताउनुभयो।