भरतपुर । चितवनका किसानले दूधको मूल्य तत्कालै बढाउन माग गरेका छन् । उत्पादन लागत तथा उपभोग्य वस्तुको भाउ बढेको जनाउँदै किसानले भरतपुरमा पत्रकार सम्मेलन गरेर दूधको मूल्य बढाउन सरकारसंग आग्रह गरेका हुन् ।
पत्रकार सम्मेलनमा चितवन जिल्ला दुग्ध उत्पादक सहकारी सङ्घका अध्यक्ष किशोर बगालेले दूधको मूल्य बढाउन र कच्चा पदार्थको मूल्यवृद्धिलाई रोक्न माग गर्नुभयो । उहाँले बैंक तथा वित्तीय संस्थाले ऋण असुली भन्दै किसानलाई धरपकड गरेको आरोप लगाउनुभयो।
चितवनलाई सरकारले ३ वर्ष अगाडि दूधमा आत्मनिर्भर क्षेत्र घोषणा गरेको थियो । जिल्लामा ३३ प्रतिशत दुग्ध उत्पादक किसान छन् । यहाँका किसानले ६८ हजार ६ सय ११ वटा गाईभैँसी पालेका छन् । जसबाट प्रतिदिन ३ लाख ५० हजार लिटर दूध उत्पादन हुँदै आएको छ।
चितवनमा उत्पादन भएको ५५ प्रतिशत दूध काठमाडौं, भक्तपुर, ललितपुर, मकवानपुर र कास्कीलगायतका जिल्लामा खपत हुँदै आएको छ। अहिले ढुटो, मकै, पिना, दाना, चोक्करजस्ता उपभोग्य वस्तुको मूल्य २० देखि ३० प्रतिशतले बढेको हुँदा किसान मर्कामा पर्दै गएको सङ्घका कोषाध्यक्ष बालकृष्ण उप्रेतीले बताउनुभयो।
उपभोग्य वस्तुको मूल्य बढ्दा किसानले प्रतिलिटर दूधमा ८ देखि १० रुपैयाँ घाटा बेहोर्नुपरेकाले सरकारलाई दूधको मूल्य बढाएर प्रतिलिटर न्यूनतम ७० बनाउन माग गरेको उहाँले बताउनुभयो।
यस्तै, पछिल्लो समय सरकारले विसं २०७८ माघ १६ गते दूधको मूल्य बढाएको थियो ।
