विराटनगर । महिला बालबालिका तथा जेष्ठ नागरिक मन्त्री भगवती चौधरीले सुदुरपश्चिम प्रदेशमा मध्यावधि निर्वाचन हुने बताउनुभएको छ ।
आज विराटनगर विमानस्थलमा सञ्चारकर्मीहरुसँगको कुराकानीमा उहाँले शक्ति सन्तुलनका अनुसार भागबण्डा नमिल्दाको परिणाम स्वरुप सुदुरपश्चिममा सरकार फेरबदल भएको बताउनुभयो ।
उहाँले राष्ट्रिय उन्मुक्ति पार्टीसँग समयमा शक्ति सन्तुलन भएको भए यो अवस्था नआउने तर्क गर्दै त्यहाँ राजनितिक दल र मुख्यमन्त्री समेत चुकेको बताउनुभयो ।
यद्यपी नयाँ बनेको कांग्रेस नेतृत्वको सरकारलाई पनि राष्ट्रिय उन्मुक्ति पार्टीले विश्वासको मत नदिने बताइरहेको भन्दै उहाँले त्यहाँ मध्यावधि निर्वाचन हुने बताउनुभयो ।
मन्त्री चौधरीले राष्ट्रिय स्वतन्त्र पार्टी पुनः सरकारमा आउनसक्ने बताउनुभएको छ । उहाँले भन्नुभयो,‘कुरा भइरहेको छ, उहाँहरु पुनः सरकारमा आउन सक्नुहुन्छ ।’
यस्तै उहाँले दुई वटा सरकारका रुपमा रहेका ब्यूरोक्र्याट्स र जनताका मन्त्रीहरुबिचको तालमेल मिलाउन प्रधानमन्त्रीले भूमिका निर्वाह गरेकाले दुई पक्षबिच सहकार्य गर्दै अघि बढ्ने विश्वास ब्यक्त गर्नुभयो ।
