झापामा सवारी दुर्घटनामा परी पछिल्लो ७ महिनामा ७५ जनाको मृत्यु

विर्तामोड । झापामा पछिल्लो ७ महिनाको अवधिमा भएका सवारी दुर्घटनामा परेर ७५ जनाको मृत्यु भएको छ।

चालु आर्थिक वर्ष २०७९–८० को माघ मसान्तसम्म यहाँ ४ सय ५७ सवारी दुर्घटना भएका छन्। उक्त दुर्घटनामा परी ७५ जनाको मृत्यु भएको जिल्ला ट्राफिक प्रहरी कार्यालय झापाका प्रमुख प्रहरी उपरीक्षक अशोककुमार जवेगुले जानकारी दिनुभयो।

कार्यालयका अनुसार साउनमा १२, भदौमा ५, असोजमा १६, कात्तिकमा ९, मङ्सिरमा १४, पुसमा १२ र माघमा ७ जनाको मृत्यु भएको हो । मृत्यु हुनेमा ५७ पुरुष, १४ महिला, २ बालक र २ बालिका छन्।

सो दुर्घटनामा १ सय ७ जना गम्भीर घाइते भएका छन् भने ६ सय ३९ जना सामान्य घाइते भएका कार्यालयले जनाएको छ ।

दुर्घटना हुने सवारीमा ४ सय ३३ ओटा मोटरसाइकल,४६ टेम्पो, ५९ साना सवारी, ३२ बस, १७ ट्रक, छ ट्रिपर, १८ ट्याक्टर र ५९ ओटा जिप–कार रहेका प्रमुख जवेगुले जानकारी दिनुभयो ।

प्रहरीले चालु आवको माघ मसान्तसम्म रू २ करोड २ लाख ६ हजार ५ सय राजवस्व सङ्कलन गरेको छ । ट्राफिक नियम उल्लङ्घन गर्ने २८ हजार ८ सय ओटा सवारीलाई कारबाही गरी उक्त राजस्व सङ्कलन गरिएको हो ।

कार्यालयले ४ हजार १ सय ३४ ओटा दुर्घटना न्यूनीकरण, ट्राफिक नियम पालनालगायत विभिन्न सचेतनामूलक कार्यक्रम समेत गरेको छ । उक्त कार्यक्रममा १ लाख ७ हजार ४२ जनाको सहभागिता रहेको कार्यालयको तथ्याङ्कमा उल्लेख छ ।

Back to top button