दोहोरीगीत प्रतिष्ठानको अध्यक्षमा रीता थापा र पशुपति शर्माको आकांक्षा

काठमाडौं । राष्ट्रिय लोक तथा दोहोरीगीत प्रतिष्ठानले आसन्न केन्द्रीय महाधिवेशनलाई प्रभावित पार्नेगरी कुनै प्रतिनिधि, उम्मेदवार वा संस्थाले आर्थिक लेनदेन गरेमा आचारसंहिता अनुसार कडा कारवाही गर्ने चेतावनी दिएको छ । अध्यक्ष रमेश बीजी र महासचिव सुवास केसीले वक्तव्य जारी गर्दै सम्भावित लेनदेन रोक्न सचेत गराउनुभएको हो ।

विज्ञप्तिमा भनिएको छ, ‘महाधिवेशनको नाममा मत प्रभावित हुने आशय राखेर कोही कसैसँग लेनदेन गरेको यो लेनदेन गर्ने आशयसहितको कुरा गरेको प्रमाण फेला परेमा त्यसरी कुरा गर्ने प्रतिनिधि, उम्मेदवार या संस्था जोकोहीलाई पनि केन्द्रीय समितिले आफ्नो आचारसंहिताको अधीनमा रही कडाभन्दा कडा कारवाही गर्ने व्यहोरा जानकारी गराइन्छ ।’

यहि फागुन १२ गतेदेखि १४ गतेसम्म धादिङमा हुन लागेको आठौं केन्द्रीय महाधिवेशनको सन्दर्भमा संस्थाले चेतावनीपूर्ण वक्तव्य जारी गरेको हो । महाधिवेशनले आगामी ३ वर्षका लागि नयाँ कार्यसमिति निर्वाचित गर्ने तयारी छ । जसका लागि चुनावी माहोल तातिएको छ र केही कलाकारले उम्मेदवारी घोषणा गर्ने तयारी गरेका छन् ।

वर्तमान कार्यसमितिमा वरिष्ठ उपाध्यक्ष समेत रहनुभएकी रीता थापा मगर अध्यक्षको उम्मेदवार बन्ने तयारीमा हुनुहुन्छ । अहिलेका प्रथम उपाध्यक्ष पशुपति शर्मा पनि अध्यक्षको आकांक्षी हो । अहिलेका द्वितीय उपाध्यक्ष रामजी खाँण प्रथम उपाध्यक्षका लागि आकांक्षी हुनुहुन्छ । महिला उपाध्यक्षमा राधिका हमालले कार्यकाल दोहोर्‍याउने मनस्थिति बनाउनुभएको छ ।

महासचिवमा शिव हमाल आकांक्षी हुनुहुन्छ । शंकर बीसी र कुलेन्द्र विश्वकर्माले तृतीय उपाध्यक्षमा आउने चाहना व्यक्त गर्नुभएको छ । तर कसैले पनि सार्वजनिक रुपमा उम्मेदवारी घोषणा गर्नुभएको छैन् । नयाँ संस्था खोल्ने तयारीमा रहनुभएका गायक विष्णु खत्रीले अध्यक्षमा उम्मेदवारी दिने सम्भावना न्यून छ । उहाँ केही सातामै बलबहादुर कार्कीलाई अध्यक्षमा नियुक्त गर्दै नयाँ संस्था खोल्ने तयारीमा हुनुहुन्छ ।

Back to top button