आन्तरिक छलफल पछि साँझ ५ बजे पनि बैठक बस्ने ४ दलको निष्कर्ष

काठमाडौं । बिहान बसेको ४ राजनीतिक दलको बैठक साँझ पनि बस्ने निष्कर्षमा पुगेको छ । बैठकको जानकारी दिँदै नेपाली कांग्रेसका महामन्त्री गगन थापाले आज बिहानको बैठक सकारात्मक भएको बताउनुभयो।

उहाँले भन्नुभयो,‘आज बिहान पनि ४ दल एकठाउँमा बसेर लामो छलफल गर्‍यौँ। विभिन्न विकल्पका बारेमा प्रस्ताव आए। छलफल सकारात्मक भएको छ। आन्तरिक छलफल पछि आजै साँझ ५ बजे फेरि बैठक बस्ने गरी हामी उठेका छौँ।’

बैठकमा नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादीका नेता सहभागी थिए। कांग्रेस सभापति शेरबहादुर देउवा, कांग्रेसका उपसभापति पूर्णबहादुर खड्का, महामन्त्री गगन थापा, नेकपा माओवादी केन्द्रबाट प्रधानमन्त्रीसमेत रहनुभएका पार्टी अध्यक्ष पुष्पकमल दाहाल ‘प्रचण्ड’, वरिष्ठ उपाध्यक्ष नारायणकाजी श्रेष्ठको सहभागीता थियो।

यस्तै, एकीकृत समाजवादीका अध्यक्ष माधव नेपाल र जसपाका अध्यक्ष उपेन्द्र यादव बैठकमा सहभागी हुनुहुन्थ्यो। यसअघि हिजो माओवादी केन्द्रको संसदीय दलको कार्यलयमा बसेको ३ दलको बैठकले कांग्रेससँग छलफल गर्ने निष्कर्ष निकालेको थियो। सोही अनुसार आज बिहानै पूर्वगठबन्धनका नेता छलफलमा जुटेका हुन्।

भोलि राष्ट्रपति निर्वाचनका लागि मनोनयन दर्ता गर्ने कार्यतालिका छ। मनोनयन दर्ताको मिति नजिकिएपछि दलहरूले छलफललाई तीव्र बनाउन थालेका छन्। आजको ४ दलको बैठकलाई चुनाव अघिको पाँचदलीय गठबन्धन ब्युँताउने प्रयासका रुपमा पनि लिइएको छ।

राष्ट्रपति चुनावमा राष्ट्रिय सहमति खोज्ने दावी गर्दै आउनुभएका प्रधानमन्त्री प्रचण्डले आज बिहान ४ दलको बैठकसँगै आजै सत्ता साझेदार नेकपा एमालेका अध्यक्ष केपी शर्मा ओलीसँग पनि वार्ता गर्ने तयारी गर्नुभएको छ ।

नेकपा एमालेले राष्ट्रपति उम्मेदवार तय गर्न भोलि बिहान ९ बजेलाई पार्टी सचिवालयको बैठक बोलाएको छ। यस्तै, नेपाली कांग्रेसले पनि भोलि बिहान साढे ८ बजेलाई केन्द्रीय कार्यसम्पादन समितिको बैठक बोलाएको छ।

Back to top button