काठमाडौं । विश्वकप क्रिकेट लिग–२ अन्तरगत त्रिदेशीय एकदिवसीय अन्तर्राष्ट्रिय शृंखलामा नेपाललाई १ सय ८० रनको लक्ष्य दिएको छ। दुबई क्रिकेट मैदानमा टस जितेर ब्याटिङ थालेको पीएनजीले ४९.२ ओभरमा सबै विकेट गुमाएर १ सय ७९ रनको योगफल तयार गर्यो।
पीएनजीका लागि ओपनर टोनी उराले ५१ बलमा ४ चौका र १ छक्कासहित ३९ रनको इनिङ खेल्नुभयो। अर्का ओपनर किप्लिन डोरिगा २६ रनमा आउट हुँदा हिरी हिरीले ३१ रनको योगदान गर्नुभयो।
अन्य ब्याटरले उल्लेख्य प्रदर्शन गर्न सकेनन्। नेपालका लागि सोमपाल कामीले १० ओभरमा ३९ रन खर्चेर २ विकेट लिनुभयो। यस्तै, दीपेन्द्र सिंह ऐरीले १० ओभरमा ३० रन खर्चेर १ मेडनसहित २–२ विकेट लिनुभयो।
यस्तै, सन्दीप लामिछाने, करण केसी र कुशल मल्लले १–१ विकेट लिनुभयो। हिजो यूएईविरुद्धको हारसँगै नेपालको शीर्ष तीनमा रहँदै विश्वकपको ग्लोबल छनोट खेल्ने सम्भावना चुनौतीपूर्ण बनेको छ। बाँकी ६ खेलमा जित निकाले मात्रै नेपालले १२ अंक जोड्दा नामिबियालाई उछिन्ने छ। नेपालको अहिले २८ अंक छ। नामिबियाको ३९ अंक छ।
स्कटल्यान्ड यसअघि नै लिग–२ च्याम्पियन बनिसकेको छ भने ओमानले पनि दोस्रो स्थान सुरक्षित गरिसकेको छ। नेपालले भोलि पपुवा न्युगिनी (पीएनजी)सँग र सोमाबर यूएईसँग यो शृंखलाको अन्तिम एकदिवसीय खेल्ने छ।
यस्तै, मार्च ९ देखि कीर्तिपुरमा नेपालले लिग–२ को अन्तिम शृंखलाको आयोजना गर्नेछ। अब एउटा मात्रै खेलमा पराजित भएपनि नेपालको शीर्ष तीनमा पुग्ने सम्भावना समाप्त हुनेछ। यस्तै, एकदिवसीय शृंखला जोगाउन पनि शीर्ष पाँचमा पुग्नुपर्ने दबाब छ।
