अन्तरस्कूल महिला क्रिकेट प्रतियोगिता भोलीदेखि हुने

विराटनगर । प्रथम विराटनगर हव अन्तरस्कुल महिला क्रिकेट प्रतियोगिता भोलीदेखि हुने भएको छ ।

नेपाल क्रिकेट फाउण्डेसनको आयोजनामा म्यारिलिबोन क्रिकेट फाउण्डेसन र क्रिकेट विथआउट बाउण्ड्रीको सहयोगमा विराटनगरमा पहिलो पटक अन्तर स्कुल महिला क्रिकेट प्रतियोगिता हुन लागेको हो ।

विराटनगरमा आज पत्रकार सम्मेलन गरी लिगको आधारमा १५ ओभरको अन्तर स्कूल महिला क्रिकेट प्रतियोगिता हुन लागेको जानकारी गराएको छ ।

फागुन २० देखि २२ गतेसम्म विराटनगर ६ केशलिया रोडमा रहेको मेल्वन विराटनगर ज्वाला क्रिकेट खेल मैदानमा प्रतियोगिता हुने फाउण्डेशनका अध्यक्ष अभिषेक श्रेष्ठले जानकारी दिनुभयो ।

प्रतियोगितामा विराटनगर र मोरङको जहदा गाउँपालिका भित्रका ६ वटा सामुदायिक विद्यालयका महिला खेलाडीहरुले भाग लिनेछन् । जसमा विराटनगरमा रहेको आर्दश, बालिका, महेन्द्र, सरस्वती, सत्यनारायण र जहदाको लक्ष्मी माविले प्रतियोगितामा भाग लिने भएका छन् ।

प्रथम विराटनगर हव अन्तर स्कूल महिला त्रिकेट प्रतियोगिताको प्रवद्र्धन विराटनगर महानगरपालिकाले गर्नेछ । प्रतियोगितामा सहभागि हुने टिमलाई कुनै पनि शुल्क लाग्ने छैन ।

प्रतियोगितामा बेस्ट ब्याटर, बेस्ट बलर, प्लेयर अफ द स्कोर, बेस्ट विकेट किपर, उदयमान खेलाडिलाई फाउण्डेसनले एक वर्षको छात्रवृत्ति प्रदान गर्ने भएको छ ।

प्रतियोगिता सम्पन्न गर्न करिब १ लाख ५० हजार रुपैयाँ खर्च हुने आयोजकको अनुमान छ । महिला क्रिकेट खेलाडीहरु उत्पादन गर्ने उद्देश्यले यो प्रतियोगिता आयोजना गरिएको अध्यक्ष श्रेष्ठले बताउनुभयो ।

‘केटाहरुले मात्र क्रिकेट प्रतियोगिता खेल्नुपर्छ भन्ने मान्यता छ, यसलाइ तोड्दै महिला क्रिकेट खेलाडी उत्पादन गर्दै खेलकुद क्षेत्रको विकास गर्ने हाम्रो उद्देश्य हो,’ उहाँले भन्नुभयो, ‘त्यसैले महिला क्रिकेट प्रतियोगिता आयोजना गरिएको हो ।’

करिब ६ महिना अगाडीदेखि विराटनगर र जहदाका २० वटा सामुदायिक विद्यालयहरुमा दक्ष प्रशिक्षक पठाएर महिला खेलाडी उत्पादनमा लागि परेको उहाँले बताउनुभयो ।

Back to top button