काठमाडौं । प्रधानमन्त्री पुष्पकमल दाहाल ‘प्रचण्ड’ले यही चैत ६ गते विश्वासको मत लिने हुनुभएको छ।
उहाँले पार्टीका सांसद र मन्त्रीलाई त्यसदिन कतै कार्यक्रम नपार्न निर्देशन दिइसक्नुभएको एक स्रोतले बतायो ।
कांग्रेस नेतृत्वमा नयाँ गठबन्धन बनेसँगै प्रचण्ड सरकारबाट एमाले, रास्वपा र राप्रपा बाहिरिएका छन् । एमाले र राप्रपाले प्रधानमन्त्रीमाथिको समर्थन फिर्ता लिए पनि रास्वपाले समर्थन अझै कायमै राखेको छ ।
विश्वासको मत लिएपछि मात्रै मन्त्रीमण्डल विस्तार गर्ने प्रधानमन्त्री प्रचण्डको तयारी छ ।
चैत्र ३ गते उपराष्ट्रपतिको निर्वाचन भएकाले यसअघि विश्वासको मत लिंदा उक्त निर्वाचन प्रभावित हुनसक्ने भन्दै उहाँले उपराष्ट्रपतिको निार्वचन लगत्तै विश्वासको मत लिन लाग्नुभएको हो । राप्रपाले फागुन १३ गते विश्वासको मत फिर्ता लिएकाले प्रचण्डलाई चैत्र १३ गते भित्र विश्वासको मत लिइसक्नु पर्ने बाध्यता छ ।
संविधानमा सरकारको समर्थन प्राप्त दल विभाजन भए वा विश्वासको मत दिने दलले विश्वासको समर्थन फिर्ता लिए एक महिनाभित्र विश्वासको मत लिनै पर्ने व्यवस्था छ ।
