विराटनगर । उपनिर्वाचनको दल दर्ता आजबाट सुरु हुँदैछ। उपनिर्वाचन आगामी वैशाख १० गते हुँने तय भएको छ ।
आजबाट सुरु हुने दल दर्ता चैत १२ गतेसम्म हुने निर्वाचन आयोगले जनाएको छ। आयोगले दल दर्ताका लागि राजनीतिक दलहरूलाई आह्वान गरिसकेको छ।
चितवन–२, बारा–२ र तनहुँ–१ मा उपनिर्वाचन हुन लागेको हो। चितवन–२ मा राष्ट्रिय स्वतन्त्र पार्टीबाट रवि लामिछाने निर्वाचित भएका थिए। नागरिकतासम्बन्धी मुद्दामा उहाँको सांसद पद गुमेको कारण पुनः चुनाव लड्न लाग्नुभएको हो ।
बारा क्षेत्र नम्बर–२ बाट निर्वाचित हुनुभएका रामसहाय प्रसाद यादव चैत ३ गते उपराष्ट्रपति निर्वाचित भएपछि उहाँले सांसद र पार्टीबाट राजीनामा दिनुभएको छ।
तनहुँ १ बाट निर्वाचित कांग्रेस नेता रामचन्द्र पौडेल फागुन २५ गते राष्ट्रपति निर्वाचित भएसँगै सांसद पदबाट राजीनामा दिनुभएको थियो। आयोगले रिक्त रहेका तीनवटै क्षेत्रमा एकैचोटि निर्वाचन गर्ने जनाएको छ।
