सरकार विस्तारपछि नतिजा देखिने गरी महत्त्वपूर्ण कामको थालनी हुन्छ : सञ्चारमन्त्री शर्मा

भैरहवा । सञ्चार तथा सूचना प्रविधि मन्त्री रेखा शर्माले सरकारले गौरव गर्नलायक कामको थालनी गरेको बताउनुभएको छ ।

नेकपा माओवादी केन्द्र सिद्धार्थनगर नगर समिति रुपन्देहीले आज गरेको कार्यकर्ता भेटघाटमा माओवादी केन्द्रकी स्थायी समिति सदस्य समेत रहनुभएकी मन्त्री शर्माले परिवर्तनकारी तप्काले गौरव महशुस गर्ने गरी काम थालेको बताउनुभयो ।

जनयुद्ध दिवसलाई राष्ट्रिय दिवसको मान्यता दिने,सहिदको नाम राजपत्रका प्रकाशित गर्नेलगायत गौरव गर्न लायक कामको थालनी गरिएको उहाँको भनाइ छ।

मन्त्री शर्माले सार्वजनिक सेवा प्रवाहलाई सहज बनाउनेदेखि मिटरब्याजलाई अपराध घोषणा गर्ने, वैदेशिक रोजगारीमा रहेका नेपालीलाई सामाजिक सुरक्षा योजनामा समेट्ने, किसानको उत्पादनको समर्थन मूल्य तोक्ने लगायतका कामको थालनी गरिएको जानकारी दिनुभयो । अब सरकार विस्तारपछि नतिजा देखिने महत्त्वपूर्ण कामको थालनी गर्ने पनि उहाँले बताउनुभयो।

यस्तै, अर्को प्रसङ्गमा उहाँले जनताका माग सरकारसम्म पुर्‍याउने र सरकारले गरेका काम जनतासम्म पुर्‍याउन स्थानीय पार्टी कमिटी र नेता कार्यकर्ताको महत्त्वपूर्ण भूमिका हुने बताउनुभयो।

मन्त्री शर्माले आज नेपाल पत्रकार महासंघ लुम्बिनीमा आयोजना गरेको राष्ट्रिय मिडिया सम्मेलनलाई सम्बोधन गर्ने कार्यक्रम छ।

Back to top button