बारा–२ मा एमालेबाट पूर्वमन्त्री पौडेलसहित ३ जनाको नाम सिफारिस

सिमरा । बारा क्षेत्र नं.–२ मा हुने उपनिर्वाचनका लागि नेकपा एमालेले पूर्वमन्त्री पुरुषोत्तम पौडेलसहित ३ जनाको नाम सिफारिस गर्ने भएको छ।

जिल्ला कमिटीले पोलिटव्युरो सदस्य एवं मधेस प्रदेश सहइन्चार्ज समेत रहनुभएका पौडेलसहित राजेश साह र बन्दना सिंहको नाम सिफारिस गर्ने निर्णय गरेको हो।

साह एमाले प्रदेश कमिटी सदस्य र सिंह अनेमसंघ बाराको अध्यक्ष हो । बारा–२ मा उपनिर्वाचन हुने भएपछि एमालेवृत्तमा पौडेललाई उम्मेदवार बनाउनुपर्ने चर्चा चलिरहेको थियो।

२०७० सालमा बारा क्षेत्र नं.–६ बाट संविधानसभा सदस्यमा निर्वाचित हुनुभएका पौडेल त्यसयता चुनाव लड्नुभएको छैन्। उहाँ सुशील कोइराला नेतृत्वको सरकारमा युवा तथा खेलकुद मन्त्रीसमेत रहनुभएको थियो।

पछिल्लो २ निर्वाचनमा बारा क्षेत्र नं.–१ बाट प्रतिनिधिसभा सदस्य पदका लागि आकांक्षी रहनुभएका पौडेलले टिकट पाउनुभएन्। उहाँ आकांक्षी रहेको क्षेत्रमा अच्युत मैनाली उम्मेदवार बन्नुभयो। २०७४ सालमा पराजय व्यहोनुभएका मैनाली यसपटक नेपाली कांग्रेसका सहमहामन्त्री उमाकान्त चौधरीलाई पराजित गर्दै प्रतिनिधिसभा सदस्य पदमा निर्वाचित हुनुभएको थियो।

सप्तरी–२ बाट पराजित जनता समाजवादी पार्टीका अध्यक्ष उपेन्द्र यादवले बारा–२ बाट चुनाव लड्ने निश्चित भएसँगै एमालेले हेभिवेट उम्मेदवारका रुपमा पौडेललाई अघि सार्न थालेको हो।

उपराष्ट्रपति रामसहाय यादवले एमालेसंगको तालमेलमा सो क्षेत्रबाट चुनाव जित्नुभएको थियो। उहाँ उपराष्ट्रपतिमा निर्वाचित भएपछि रिक्त रहेको उक्त क्षेत्रमा उपनिर्वाचन हुन लागेको हो।

यसैगरी लोसपाबाट राजेन्द्र महतोको नाम चर्चामा छ। लोसपाले महतोलाई बारा–२ बाट उम्मेदवार बनाउने आन्तरिक तयारी गरिरहेको छ। महतो सर्लाही–२ बाट पराजित हुनुभएको थियो।

यसैगरी जनमत पार्टीबाट शिवचन्द्र कुशवाहा उम्मेदवार बन्ने निश्चित छ। नेकपा माओवादी केन्द्रका कुशवाहा हालका उपराष्ट्रपति यादवसंग पराजित हुनुभएको थियो। उपनिर्वाचनमा माओवादी केन्द्र र कांग्रेसले जसपा अध्यक्ष यादवलाई सघाउने संकेत पाएपछि कुशवाहा जनमत पार्टी प्रवेश गरेर उम्मेदवार बन्न लाग्नुभएको हो ।

रवि लामिछाने नेतृत्वको राष्ट्रिय स्वतन्त्र पार्टीबाट रमेश खरेल उम्मेदवार बन्ने तयारीमा हुनुहुन्छ। काठमाडौं–१ बाट पराजित खरेललाई स्वतन्त्र पार्टीले उम्मेदवार बनाउन लागेको हो।

खरेल काठमाडौं–१ मा नेपाल सुशासन पार्टीबाट उम्मेदवार हुनुहुन्थ्यो। उपनिर्वाचनमार्फत प्रतिनिधिसभामा प्रवेश गर्न हेभिवेट उम्मेदवारहरु बारा–२ केन्द्रित भएपछि चुनाव प्रतिस्पर्धात्मक हुने देखिएको छ। बारा–२ मा स्वतन्त्र उम्मेदवारसमेत देखिनेछन्।

Back to top button