मोटरसाईकल चोरीमा सम्लग्न गिरोह पक्राउ

विराटनगर । विराटनगरमा मोटरसाइकल चोरी गर्ने संगठित गिरोह परिचालित भएको पाइएको छ ।

प्रहरीले चैत लागेपछि मात्रै संगठित गिरोहमा संलग्न रहेका दुईजना भारतीय नागरिकसहित ६ जनालाई पक्राउ गरेको छ । उनीहरुको साथबाट एकथान स्कुटर र चारथान मोटरसाइकल बरामद भएको छ ।

जिल्ला प्रहरी कार्यालय मोरङले मोटरसाइकल चोरी नियन्त्रण चलाएको विशेष अप्रेशन अन्तर्गत मोरङ र सप्तरीका विभिन्न स्थानबाट गिरोहमा संलग्नहरुलाई पक्राउ गरेको हो ।

जिल्ला प्रहरी कार्यालय मोरङका प्रहरी नायव उपरीक्षक एवं प्रवक्ता रन्जनकुमार दाहालका अनुसार संलग्नहरुबाट ‘मास्टर की’ ५ वटा र नक्कली नम्बर प्लेट समेत बरामद भएको छ ।

चोरी गर्नका लागि ‘मास्टर की’ प्रयोग गरेर मोटरसाइकल खोल्ने र नक्कली नम्बर प्लेटर लगाई गन्तव्यसम्म पुर्‍याउने गरेको देखिएको छ ।

प्रहरीको अनुसन्धानमा विराटनगरमा चोरी भएका मोटरसाइकलबाट नेपाल–भारत अवैध मदिरा, लागुऔषध ओसारपसार हुने देखिएको छ ।

पहाड र तराईका ग्रामिण क्षेत्रमा नम्बरप्लेट परिवर्तन गरेर बिक्री गर्ने, इन्जिन झिकेर पानी तान्ने मोटरको रुपमा बिक्री गर्ने देखिएको छ ।

प्रहरीले फागुन १० गते विराटनगर–७ मालपोत कार्यालय अगाडीबाट चोरी भएको को २५ प १९९५ नम्बरको मोटरसाइकल चोरीमा संलग्न रहेको आरोपमा सुनसरी देवानगञ्ज–३ का राजकुमार यादव, भारत अररिया लक्ष्मीपुर १० का सुशिल कुमार यादव र पोसदाह पञ्चायत भारत बस्ने सौरभकुमार यादवलाई चैत २१ गते पक्राउ गरेको थियो ।

उनीहरुको साथबाट नम्बर नखुलेको थप दुईवटा मोटरसाइकल समेत बरामद भएको थियो । यसैगरी चैत २४ गते विराटनगर १६ बाट प्रदेश नं. २–०२–००३ प ५२५९ नम्बरको मोटरसाइकल चोरी गरेको आरोपमा सुनसरी भोक्राहा नर्सिङ–६ का सुमनकुमार यादवलाई पक्राउ गरेको थियो ।

यसैगरी विराटनगर–१२ सेन्ट्रल महलको पार्किङस्थलबाट गत माघ २१ गते को २७ प ६९४९ नम्बरको स्कुटर चोरी आरोपमा विराटनगर–१२ का दिनेस साह र सञ्जय साहलाई चैत २४ गते पक्राउ गरेको छ ।

Back to top button