विराटनगर । विराटनगर महानगरपालिकाले मुख्य सडकलाई पार्किङ निषेध गर्ने अभियानलाई निरन्तरता दिएको छ ।
पार्किङस्थललाई व्यवस्थित गर्न भन्दै केही समय स्थगित गरेको पार्किङ निषेध अभियानलाई महानगरले आजदेखि पुनः पूर्ववत् अवस्थामै कार्यान्वयनमा ल्याएको हो ।
आज शनिमन्दिरदेखि अस्पतालचोक, जलजलाचोकदेखि पञ्चमुखी हनुमान मन्दिर, ट्राफिकचोक आसपास र हिमालय रोडलाई पार्किङ निषेध गर्ने महानगरको यसअघिको निर्णयलाई कार्यान्वयनमा ल्याइएको छ ।
पार्किङ स्थलमा सिसी क्यामेरा र बत्ती जडान गर्नुका साथै गिट्टी हालेर सम्याएर व्यवस्थित गरिसकेको नगर प्रहरीका प्रमुख राजन पौडेलले जानकारी दिनुभयो ।
व्यापारीहरुले पार्किङस्थललाई व्यवस्थित र सुरक्षित बनाउन माग गर्दै आएका थिए । व्यापारीहरुको माग सम्बोधन गर्दै केही समय पार्किङ निषेधलाई स्थगन गरेर महानगर सिसी क्यामेरा र बत्ती जडान गर्न भुइँमा गिट्टी हालेर सम्याएर व्यवस्थित गर्न लागेको थियो ।
सबै पार्किङस्थल व्यवस्थित भएकाले अब क्रमशःः पूर्ववत् निर्णयलाई कार्यान्वयन गर्दै लगिने मेयर नागेश कोइरालाले बताउनुभयो । उहाँले विराटनगरलाई व्यवस्थित बनाउने महानगरको अभियानमा साथ दिन आग्रह समेत गर्नुभयो ।
सुरुमा केही असहज र असजिलो महसुस भए पनि विस्तारै बानी हुँदै गएपछि सहज हुने उहाँको भनाइ छ । विराटनगरलाई सफा, सुन्दर र व्यवस्थित बनाउने अभियानमा साथ दिन मेयर कोइरालाले विराटनगरवासीलाई आग्रह गर्दै आउनुभएको छ ।
