यसपटकको बजेट पञ्चायतको जस्तो : पृथ्वीसुब्बा गुरुङ

काठमाडौं । नेकपा एमाले सांसद् पृथ्विसुब्बा गुरुङले यसपटकको बजेट पञ्चायतको जस्तो भएको बताउनुभएको छ । आज प्रतिनिधि सभामा बोल्दै सांसद् गुरुङले सामाजिक क्षेत्रको दायित्व पूरा गर्नेतर्फ बजेट केन्द्रित नै नभएको बताउनुभयो।

उहाँले भन्नुभयो,‘राज्यको शक्ति र स्रोतको अधिकार ७६१ वटा सरकारसँग छ भन्ने बजेटले भुलेको छ । यो बजेट एकात्मकबादी छ । संघीय लोकतान्त्रिक गणतन्त्रको मर्मलाई बजेटले भुलेको छ । यो पञ्चायतको बजेट जस्तै भयो । बहुदलकालको पुनरावृत्ति भयो । यो प्रगतिशील बजेट भएन ।’

नारा र निबन्धमा राम्रो बजेट भएपनि सही मार्ग समात्न नसकेको बताउनुभयो । गुरुङले भन्नुभयो,‘बजेटमा शिक्षा, स्वास्थ्य क्षेत्रमा लगानी गर्ने योजना छैन, संघीयतालाई सबल बनाउने लक्ष्य नै छैन । पुजिंगत खर्च बढाउने कुरा बजेटमा उल्लेख गरिए पनि कुरा मात्रै भयो।’