धेरैजसो कम्पनीको मूल्य बढ्दा पनि घट्यो सेयर बजार

काठमाडौं । आज धेरैजसो कम्पनीको सेयर मूल्य बढ्दा पनि समग्र परिसूचक नेप्से भने घटेको छ ।

१२२ कम्पनीको मूल्य बढ्दा १०९ को घट्यो भने ८ को स्थिर रह्यो । तर, बजारको परिसूचक नेप्से भने अघिल्लो दिनको तुलनामा ३ दशमलव ४ अंक घटेको छ ।

समग्रमा मूल्य घटेका कम्पनीहरुको कुल पूँजीकरण बढेका कम्पनीहरुको भन्दा बढी भएकाले धेरैजसो कम्पनी बढ्दा पनि बजार घट्न पुगेको हो ।

आजको गिरावटपछि नेप्से १८४७ विन्दुमा कायम भएको छ । अघिल्लो दिनको तुलनामा कारोबार रकम पनि बढेको छ । आइतबार ९६ करोड ४० लाख रुपैयाँको कारोबार भएकोमा सोमबार १ अर्ब १९ करोडको कारोबार भयो । सोमबार अरु समूहभन्दा जीवन बीमामा आकर्षण देखिएको छ । सो समूह ० दशमलव ९७ प्रतिशतले बढ्यो ।

बैंकिङ ७, होटल तथा पर्यटन ९, जलविद्युत् २, उत्पादन १७, माइक्रोफाइनान्स १, अन्य ८ र व्यापार उपसमूह १२ अंक घटे । जीवन बीमा समूह ९८ तथा निर्जीवन बीमा समूह ३४ अंक बढे । विकास बैंक १ र फाइनान्स समूह ९ अंक बढे ।

समाज लघुवित्तको मूल्य ८ प्रतिशत बढेर प्रतिकित्ता १२२ रुपैयाँ पुगेको छ । तेह्रथुम पावरको ५ दशमलव ८८, मोलुङ हाइड्रोपावरको ४ दशमलव ९, हिमालयन हाइड्रोपावरको मूल्य ४ दशमलव ५ प्रतिशत बढ्यो ।

एनआरएन इन्फ्रास्ट्रक्चर र माउन्टेन इनर्जीको मूल्य १० प्रतिशत घट्यो । इङ्वा हाइड्रोपावरको ५ दशमलव ५, इमर्जिङ नेपालको ४ दशमलव १ प्रतिशत मूल्य घट्यो ।

कारोबार रकमका आधारमा सोनापुर सिमेन्ट, हिमालयन डिस्टिलरी, सिटिजन लाइफ, सानिमा जनरल इन्स्योरेन्स र शिवम् सिमेन्ट क्रमशः अगाडि रहे ।

Back to top button