काठमाडौं । राष्ट्रिय स्वतन्त्र पार्टी (रास्वपा)की केन्द्रीय सदस्य एवं प्रतिनिधि सभाकी सांसद डा.तोसिमा कार्कीले रास्वपा फुट्ने कल्पनासमेत नगर्न सबैलाई आग्रह गर्नुभएको छ । उहाँले आज बिहानै सामाजिक सञ्जाल फेसबुकमार्फत २०८४ को निर्वाचनमा कुनै पनि हालतमा घण्टी बज्ने दाबी गर्नुभयो ।
उहाँले रास्वपा ठूलो लक्ष्य लिएर गठन भएको दाबी गर्दै देश बनाउनका लागि यो पार्टी बनेको बताउनुभयो ।
कार्कीले लेख्नुभएको छ,‘के रे के रे? फुट्ने रे? कल्पना पनि नगर्नुस्, हुँदैन हामी त्यसो हुनै दिँदैनम् । साना लक्ष्यले जुट्या पार्टी हैन, देश बनाउने पार्टी हो, देश बनाउने । चौरासी त हुन्छ हुन्छ । हुनैपर्छ जनताले देश भित्रै सम्भावना र समृद्धि देख्न पाउनै पर्छ । साना दौडमा हिँड्या होइनौ । देश बनाउन हिँड्या हौँ, देश बनाउन । ठूलो छाती ठूलो मुटु लिएर हिँड्या छौ । त्यसैले कोसिस नगर्नुस्, सक्नुहुन्न ।’
उहाँले २०८४ मा घण्टी बज्ने भन्दै आफ्नो पार्टीको महाअभियानमा जुट्नका लागि सबैलाई आग्रहसमेत गर्नुभएको छ । आफूले विधिको शासन भनेर सामाजिक सञ्जालमा लेख्दा फरक–फरक व्याख्या भएको भन्दै सबै ठाउँमा विधिको शासन स्थापित गरेर छोड्ने दाबीसमेत गर्नुभयो ।
कार्कीले लेख्नुभएको छ,‘घण्टी त बज्छ बज्छ चौरासीमै बज्छ बरु आउनुस् तपाईँहरू पनि यो महाअभियानमा नछुट्नुस् । विधिको शासन? ए ए, सबैले आ–आफ्नै व्याख्या प्रतिव्याख्या गर्नुभएछ । विधिको शासन देशमै छैन हजुर । सरकारमै छैन । स्वास्थ्य मन्त्रीको हरकतमा छैन । न्यायालयमै छैन । निराश नहुनुस्, सबै ठाउँमा हामी त्यो स्थापित गरेरै छाड्छौँ ।’
