काठमाडौं । निर्वाचन आयोगले मतदाता नामावली दर्ता तथा अद्यावधिक गर्ने कार्य उप–निर्वाचन अवधिसम्मका लागि स्थगित गरेको छ । आयोगको आज बसेको बैठकले आगामी वैशाख १५ गतेका लागि उप–निर्वाचनका लागि मिति तोकेसंगै आयोगले मतदाता नामावली दर्ता तथा अद्यावधिक गर्ने कार्य स्थगित गरेको हो ।
मतदाता नामावली ऐन, २०७३ को दफा चारको उपदफा (२) बमोजिम निर्वाचनको मिति घोषणा भइसकेपछि निर्वाचन प्रयोजनका लागि मतदाता नामावलीमा नाम दर्ता नहुने व्यवस्था भएकोले अहिले नियमित रूपमा भइरहेको मतदाता नामावली दर्ता तथा अद्यावधिक कार्य अर्को व्यवस्था नभएसम्मको लागि स्थगन गर्ने निर्णय भएको आयोगका उपसचिव एवम सहायक प्रवक्ता डा. थानेश्वर भुसालले जानकारी दिनुभयो ।
उहाँका अनुसार २०७९ मंसिर ४ गते सम्पन्न प्रतिनिधिसभा र प्रदेशसभा सदस्यको निर्वाचनपछि रिक्त भएको इलाम प्रतिनिधिसभा निर्वाचन क्षेत्र नं.दुईको प्रतिनिधि सभा सदस्य तथा बझाङ प्रतिनिधि सभा निर्वाचन क्षेत्र नं.१ को प्रदेशसभा निर्वाचन क्षेत्र नं.१ को प्रदेशसभा सदस्यको रिक्त पदका लागि २०८१ वैशाख १५ गते शनिबार उपनिर्वाचन गर्ने गरी निर्णय भइसकेको छ ।
