हामीले रोपेको बिरुवा आउने मालीले फक्राउनु हुनेछ भन्ने विश्वास लिएको छु : सुदन किराती

काठमाडौं । अघिल्लो गठबन्धनबाट संस्कृति, पर्यटन तथा नागरिक उड्डयन मन्त्रालयको जिम्मेवारीमा रहनुभएका सुदन किराँतीले मन्त्री निवास छाड्नुभएको छ ।

आज मन्त्री निवासबाट बिदा भएको तस्वीर पोष्ट गर्दै उहाँले भन्नुभयो,‘पस्दा मलाई धेरै डर लागेको थियो, तर निस्कँदा खुसी छु ।’

उहाँले आफ्नी आमाको भनाइ उदृत गर्दै भन्नुभयो,‘जिम्मेवारी पाउनु गाह्रो कुरा हो, त्यो भन्दा गाह्रो त पूरा गर्नु हो ।’

यस्तै,४ सय १३ दिन मन्त्री पदमा बसेर देश र जनताको सेवा गरेको भन्दै उहाँले यो अवसर प्रदान गर्ने प्रधानमन्त्री प्रचण्ड, पार्टी, मतदातामा धन्यवाद ज्ञापन गर्नुभएको छ ।

आफू र आफ्नो टिमले सकेको कोशिस गरेको भन्दै उहाँले भन्नुभयो,‘हामीले रोपेको बिरुवामा धेरै कोपिला लागेको छ, आउने मालीले फक्राउनु हुनेछ भन्ने विश्वास लिएको छु ।’

मन्त्री पदमा बस्दा बुबाको मृत्यु भएको सन्दर्भ निकाल्दै उहाँले भन्नुभयो,‘मेरो राजनीतिक जीवनको हजार मृत्युहरु पटक–पटक देखें र राजनीतिक मृत्युलाई मैले छल्न सकें तर प्राण लिने मृत्युलाई बुबाले छल्न सक्नु भएन ।’

Back to top button