काठमाडौं । नेकपा एमालेका अध्यक्ष केपी शर्मा ओलीले सुकुम्बासी बस्तीमा डोजर चलाउन बन्द गर्न आग्रह गर्नुभएको छ । उहाँले सुकुम्बासीलाई व्यवस्थापन गर्न छोडेर डोजर चलाएर आतंक नमचाउन आग्रह गर्नुभएको हो ।
‘प्लास्टिकको छाप्रो रहेको सुकुम्बासी बस्तीमा हामीले डोजर देखाएर आतंक फैलाइरहेका छौं। डोजर चलाउन बन्द गरेर उनीहरूको समस्या व्यवस्थापन गर्नतिर लागौं,’ उहाँले भन्नुभयो।
अध्यक्ष ओलीले संघ, प्रदेश र स्थानीय सरकारलाई सुकुम्बासी समस्या व्यवस्थापन गरेर समाधान गर्न आग्रह गर्नुभयो। ‘डोजर चलाउने गरिबका छोरा–छोरी नै हो। गरिबका छोरा–छोरीलाई गरिबविरुद्ध डोजर चलाउन रोकौं । धनीले डोजर चलाएको मैले थाहा पाएको छैन,’ उहाँले भन्नुभयो,‘तीनवटै सरकार जनताप्रति उत्तरदायी हुनुपर्छ।’
उहाँले लोकतन्त्रमा जे पनि गर्न नमिल्ने बताउनुभयो। ‘अहिले हामी सरकारमा आएका छौं । तर विभिन्न बहानामा कर्मचारीतन्त्र बाधक बनिरहेका छन्। जनताका समस्याप्रति जिम्मेवार बन्न आग्रह गर्न चाहन्छु। लोकतन्त्रमा जे पनि गर्न मिल्दैन। सुकुम्बासी समस्या व्यवस्थापन गर्नुपर्छ। समाधान गरेर जानुपर्छ,’ उहाँले भन्नुभयो।