दूध किसानको भुक्तानी तत्काल उपलब्ध गराउन सांसद बर्तौलाद्वारा सरकारको ध्यानाकर्षण

काठमाडौं । नेकपा एमाले सांसद महेश बर्तौलाले दूध किसानको बक्यौता रकम तत्काल उपलब्ध गराउन सरकारको ध्यानाकर्षण गराउनुभएको छ । आज प्रतिनिधिसभा बैठकमा आकस्मिक समय लिएर सांसद बर्तौलाले किसानको भुक्तानीका लागि सरकारको ध्यानाकर्षण गराउनुभएको हो ।

उहाँले आजदेखि आन्दोलन सुरू गरेका किसानलाई प्रहरीले नियन्त्रणमा लिएको भन्दै गृहमन्त्रालयको ध्यानाकर्षण समेत गराउनुभयो ।

‘दूधको बक्यौताको माग गर्दै आजदेखि किसानहरू आन्दोलनमा उत्रिएका छन्। आन्दोलित ४५ बढि किसानलाई प्रहरीले हिरासतमा राखिएको छ। उहाँहरूमाथि चरम धरकपड भएको छ। उनीहरूले न्यायोचित माग उठाएका छन्। दूध बेचेको रकम भुक्तानीका लागि आन्दोलन गर्नुपर्ने परिस्थितिमा किसानहरू पुगेका हुन्,’उहाँले भन्नुभयो,‘यसकारण सभामुखमार्फत सरकारको, कृषि मन्त्रालय र अर्थमन्त्रालयको ध्यानाकर्षण गराउन चाहन्छु। राज्यको तर्फबाट र राज्यले वातावरण बनाइ दिएर किसानहरूले पाउनेपर्ने दूधको बक्यौता अविलम्बन प्राप्त होस। भुक्तानी गरियोस्।’

एमाले प्रमुख सचेतक समेत रहनुभएका बर्तौलाले डीडीसीबाट झन्डैं २ अर्ब र निजी डेरीबाट ३ अर्ब गरी झन्डैं ६ अर्ब रुपैयाँ भुक्तानी हुन बाँकी रहेको बताउनुभयो। किसानहरूले दूधको रकम नपाउँदा गाईवस्तुलाई दानापानीको व्यवस्था मात्रै नभइ आफूहरू पनि भोकै बस्नुपर्ने अवस्थामा पुगेको बताउनुभयो।

बर्तौलाले आन्दोलनरत किसानका न्यायोचित माग पूरा गर्न सरकार गम्भीर हुनुपर्ने बताउनुभयो । उहाँले भन्नुभयो,‘किसानहरूले न्यायोचित माग गरेका छन्। सरकारले तत्काल वार्ताको माध्यमबाट भुक्तानी गर्ने वातावरण सुनिश्चितता गरोस्। यसका लागि फेरि पनि आग्रह गर्न चाहन्छु।’

दूधको भुक्तानी नपाएको भन्दै किसानहरूले आजदेखि फेरि आन्दोलन सुरू गरेका छन्।

Back to top button