विराटनगर । विराटनगर वडा नम्बर १८ ले गरिब तथा जेहेन्दार विद्यार्थीहरुलाई साइकल वितरण गरेको छ । आज वडा कार्यालयमा आयोजित कार्यक्रममा महानगरपालिकाका मेयर नागेश कोइरालाले जेहेन्दार विद्यार्थीहरुलाई साइकल वितरण गर्नुभएको हो ।
विद्यार्थीलाई विद्यालय जान–आउन सहज होस् भनेर साइकल वितरण गरिएको वडाध्यक्ष जितेन्द्रकुमार साहले बताउनुभयो । स्थानीय जनक आधारभुत र जानकी आधारभुत विद्यालयमा ६ र ७ कक्षामा अध्ययनरत १२ जना छात्राहरुलाई साइकल वितरण गरिएको उहाँले जानकारी दिनुभयो ।
कार्यक्रमलाई सम्बोधन गर्दै मेयर कोइरालाले महानगरले सामुदायिक विद्यालयको गुणस्तर वृद्धिका लागि योजनाबद्ध रुपमा कार्य गरिरहेको बताउनुभयो ।
उहाँले चालु आर्थिक वर्षको बजेटबाट सबै सामुदायिक विद्यालयलाई पंखा वितरण गरेको समेत जानकारी दिनुभयो । उहाँले विद्यालयको गुणस्तर वृद्धिका लागि प्रधानाध्यापकहरुसँग कार्यसम्पादन मुल्यांकन सम्झौता गरेको बताउनुभयो ।
