काठमाडौं । आईसीसी पुरुष क्रिकेट विश्वकप लिग–२ मा आज नेपालले घरेलु टोली ओमानसँग खेल्दैछ ।
ओमानको अल अमिरेत रंगशालामा नेपाली समयअनुसार बिहान ११ः१५ बजे सुरु हुने यो खेल जित्नै पर्ने दबाबमा नेपाल रहेको छ ।
लिग–२ को अन्तिम खेलमा नेपालले ओमानलाई पराजित गर्न सके मात्र छैटौँ स्थान पक्का हुनेछ । नत्र सातौँ स्थानमै रहेर लिग टुंगाउने छ ।
नेपाल पराजित भए क्यानडाको शीर्ष ६ पक्का हुनेछ । नेपालले यसअघि नै विश्वकप छनोट खेल्ने अवसर चुकाइसकेको छ । तर, प्लेअफ खेल्ने छ ।
नेपाल ३५ खेलमा २८ अंकसहित सातौँ स्थानमा छ । यता, ओमान भने ३१ खेलमा ३३ अंकसहित चौथो स्थानमा रहँदै एकदिवसीय विश्वकपमा छनोटमा स्थान बनाइसकेको छ ।
सुरुआती दुई खेलमा ओमान र क्यानडालाई हराएको नेपाल पछिल्लो खेलमा भने क्यानडासँग पराजित भएको हो । यस्तै पहिलो खेलमा क्यानडाविरुद्व जित निकालेको ओमान नेपाल र क्यानडासँग पराजित भएको थियो ।
