जम्मुमा पुलबाट बस खस्दा १० जनाको मृत्यु, २० घाइते

जम्मुको कटराबाट १५ किलोमिटर टाढा झज्जर कोटली नजिक आज बिहान बस पुलबाट खसेर दुर्घटना भएको छ। उक्त दुर्घटनामा १० जनाको मृत्यु भएको छ भने २० जना घाइते भएका छन्।

स्थानीय बासिन्दा, सीआरपीएफ र एसडीआरएफले घटनास्थलमा मानिसहरूको उद्धार गरेको छ।

बस अमृतसरबाट वैष्णोदेवी जाँदै थियो। त्यसमा ७५ यात्रु सवार थिए। सबै यात्रु बिहारका हुन्। जम्मूका उपायुक्त अवनी लवासाले दुर्घटनामा ४ जना गम्भीर घाइते भएको बताउनुभयो। अरुलाई सामान्य चोट लागेको छ।

गम्भीर घाइतेलाई जीएमसी जम्मुमा भर्ना गरिएको छ। अन्य घाइतेको स्थानीय स्वास्थ्य केन्द्रमा उपचार भइरहेको भारतीय संचार माध्यमले जनाएका छन् ।